Amirka za ta kafa rundunar sojin sama jannati

A wani sako da Shugaba Donald Trump ya aika wa ministan tsaron kasar ta Amirka Jim Mattis da kuma fadar White House ta wallafa, ya umurci ministan da ya ba da sunan wani daga cikin manyan sojojin kasar da ya dace a nada a shugabancin wannan rundunar soji ta saman jannati ta kasar ta Amirka.

Kafa wannan runduna na a matsayin wani babban ci-gaba wajen cimma burin da Shugaba Trump ya sa a gabansa na samar da rundunar sojojin sama jannati a kasar. Sai dai kuma masu lura da harakokin siyasar kasar ta Amirka na ganin wannan shiri na iya fuskantar adawa daga majalisar dokokin kasar ta Amirka wacce ita ce ke da hurumin amincewa da kudaden girka wannan runduna.