An cimma yarjejeniyar warware rikicin Tigray

Gwamnatin Ethiopiya da wakilan Tigray sun amince da kwance damarar yaki, kana sannu a hankali kuma cikin doka da oda a tsara yadda za a karbi makamai daga hannun mayakan a cewar manzo tarayyar Afrika (AU) na musammam kuma tsohon shugaban Najeriya Olusegun Obasanjo.

Cimma yarjejeniyar sulhu dai wani babban al'amari ne a rikicin na Ethiopiya, inji shi a taron manema labarai da ya gudanar a birnin Pretoria, bayan zaman tattaunawar da ta dauki tsawon mako guda ana laluuben hanyar kawo karshen wannan rikici, da ya kashe daruruwa daura da koran dubbai daga matsugunnensu.