An sanar da ranar jana'izar Sarauniya Elizabeth ta II

Rahotanni daga fadar Buckingham ta Burtaniya, na cewa za a yi jana'izar marigayiya Sarauniya Elizabeth ta II a ranar 19 ga wannan wata na Satumba da muke ciki a Westminster Abbey da ke birnin London. Za dai a binne sarauniyar ne, bayan an bai wa al'umma damar yin bankwana da gawarta.

Sarauniya Elizabeth ta II ta kasance Sarauniya mafi dadewa a kan karaga a tarihi, kuma ta rasu ne tana da shekaru 96 a duniya bayan ta kwashe tsawon shekaru 70 tana mulki.

A ranar Alhamis din da ta gabata ne dai, sarauniyar ta riga mu gidan gaskiya a gidanta da take hutun bazara a Balmoral da ke Scotland.

Tuni dai aka yi bikin rantsar da babban danta Sarki Charles na III a matsayin sabon Sarki a fadar ta Buckingham, bikin da ke zaman matakin farko na bayyana sabon sarki a Birtaniya.