Brazil: Bolsonaro ya fara jinya a asibitin Amirka

An kwantar da tsohon shugaban kasar Brazil Jair Bolsonaro a wani asibiti da ke jihar Florida ta Amirka. Tsohon shugaban ne da kansa ya sanar da haka a shafinsa na Twitter.

Bolsonaro dan shekaru 67 ya yi wa likitoci korafin jin zafi a cikinsa. A shekara ta 2018, lokacin da yake gangamin yakin neman zabe, wani mutum ya daba masa wuka a ciki, lamarin da ya kusan yin ajalinsa. Sai dai babu tabbas ko wannan tsohon ciwon ne yanzu ya tashi.

Hakan na zuwa ne kwana guda bayan da kasashen duniya suka fara Allah wadai da magoya bayansa wadanda suka kutsa kai ginin Majalisar dokokin Brazil, a wani mataki na nuna rashin amincewarsu ga sabuwar gwamnatin da Lula da Silva ya karba a farkon wannan shekara.

Tun a gabanin rantsar da sabuwar gwamnatin, tsohon shugaba Bolsonaro ya bar kasa, inda ya samu mafaka a Amirka bayan makonnin da ya kwashe yana zargin murdiya a zaben shugaban kasar da ya sha kaye.