Afghanistan na sake shiga tasku

Kamfanin dillancin labaran Jamus din dpa ya ruwaito ma'aikatar harkokin cikin gida ta Jamus din na bayyana da cewa, sakamakon halin rashin tabbas kan tsaro da a yanzu haka Afghanistan din ke ciki, mahukuntan Berlin sun yanke shawarar dakatar da mayar da masu neman mafakar na Kabul zuwa wani lokaci. Tun bayan da dakarun sojojin kasashen ketare suka fara ficewa daga Afghanistan din ne dai, mayakan na Taliban suka fara zafafa hare-hare tare da kwace iko da yankuna da dama a kasar. Ita ma kasar Netherlands, ta sanar da dakatar da mayar da masu neman mafaka daga Afghanistan din gida. Kawo yanzu mayakan na Taliban, sun kwace iko da manyan biranen gundumomi tara cikin 34 da ake da su a Afghanistan din.