Barazanar rufe Twitter a Turai

Kungiyar EU ta gargadi sabon shugaban Twitter Elon Musk kan bukatar kara tsauraran matakan yaki da kalaman batanci da cin zarafin al'umma da kuma yada labaran karya a kafar sadarwar.

EU ta ce saba sabbin dokokinsu ka iya kai su ga cin sa tarar makudan kudi ko ma haramta shafin gabaki daya a kasashen nahiyar.

Kwamishinan kungiyar a kan manufofin yanar gizo ne ya bayyana haka a wata tattaunawa da suka yi a jiya Laraba. Sai dai kamfanin na Twitter ya sha alwashin bin ka'ida kamar yadda suka saba.

 

A farkon shekara mai kamawa ne manyan kamfanoni intanet za su fara amfani da sabbin dokokin da kungiyar ta EU ta samar .