Takaddamar Rasha da kasashen duniya

Shugaba Vladimir Putin na Rasha ya ce, yana nazarin bukatar da 'yan awaren Gabashin Ukraine suka shigar, na son aiyana su a matsayin yankuna masu cin gashin kansu. Kungiyar Tarayyar Turai ta ce, za ta mayar da martani na sanya wa Rasha takunkumi muddun ta aiyana yankunan na Donetsk da Luhansk a matsayin masu cin gashin kansu.

Tun a makon da ya gabata ne, majalisar dokokin Rasha ta bukaci Shugaba Putin, da ya amince da yankuna biyu da Rashan ke mara wa baya a gabashin na Ukraine a matsayin kasashe masu cin gashin kansu. 

Majalisar ta ce, amincewa da yankin Donetsk da Luhansk, zai kasance muhimin mataki, wanda zai kawo karshen shirin zaman lafiya na Minsk a gabashin Ukraine, amma kasashen yamma sun baiyana shakku dama fargaba a zargin da suke ma Rashan na son mamaye Ukraine.