Masu takara a jam'iyyun Najeriya sun yi Allah wadai

Shugaban hukumar zaben ta Najeriya Mahmood Yakubu ya shaida wa masu sanya ido da wakilan kasashen ketare cewar wannan al'amari ya samu ne sakamakon rashin kyawun yanayin da ya hana jirage dauke da kayan zabe sauka, da kuma gobarar da ta tashi a ofisoshin zabe uku a fadin kasar. Tun da fari magoya bayan Atiku Abubakar mai takarar shugabancin kasar a jam'iyyar PDP, sun zargi shugaba Muhammadu Buhari da masaniya game da wannan danbarwa, kafin daga baya shugaba Buhari ya bayyana takaicin sa game da faruwar wannan al'amari. Inda ya ja hankalin al'umma musamman matasa su guji tada tarzoma saboda banbancin ra'ayin siyasa.