kasar Girka ta ceto bakin haure 145

Ba a bayyana sunaye ko kasashen da bakin hauren suka fita ba, amma hukomomi Girka sun tabbatar cewa masu fataucin mutane ne suka yi watsi da su a wannan tsibiri a kokarin shigar da su ta barauniyar hanya. Wannan dai ba shi ne karon farko da masu fasa-kwauri ke tura bakin haure zuwa yankin Girka ba.

Fadar mulki ta Athens ta saba zargin Turkiyya da barin bakin haure tsallakawa zuwa Girka. A farkon watan Yunin ma, wani yunkuri da Girka ta yi a wannan yanki, ya bada damar ceto mutane 91. Dubban bakin haure musamman daga kasashen Syria da Afghanistan da Pakistan ne suka saba shiga kasar Girka a shekarun baya-bayan nan daga kan iyakokin ruwa da kasa da Turkiyya.