Kasar Ukraine ta rasa sojojin ta biyar

Hukumomin birnin Kiev na kasar Ukraine, sun ce an kashe sojin kasar su biyar tare da jikkata wasu 27 a wani dauki ba-dadi tsakanin magoya bayan 'yan awaren rasha dake a gabashin kasar.

Wani kakakin soji a yankin, Andriy Lysenko ya shaidawa kamfanin dillancin labaran Reuters cewa a cikin sa'o'i 24, fada ta kazanta tsakanin sojin Ukraine din da kuma bangaren 'yan awaren na Rasha, a wani wajen da ke karkashin ikon dakarun gwamnati, a arewa maso gabashin birnin Donetsk. An dai kyautata fatar samun yarjejeniyar tsagaita wuta a ranar Asabar din data gabata, lokacin da aka yi zaman tattaunawa da jami'an Ukraine da na Rasha dama 'yan aware, sai dai an tashi baram-baram.