Masu kare hakki na yin tir da tsare yara a Nijar

Sama da mutane 400 ne akasarin su matasa, mahukuntan kasar ta Nijar suka ce sun kame lokacin kazamar zanga-zangar da ta yi sanadiyyar asarar rayuka da ta dukiyoyi a birnin Yamai. Ko yanzu haka a kowace safiya, iyayen matasan na kai kawo wajen ganin ‘ya’yan nasu a inda ake tsare da su a makarantar horas da ‘yan sanda ta kasa da ke a birnin na Yamai.

Wasu daga cikin iyayen yaran da DW ta zanta da su a gaban cibiyar da ake tsare da yaran nasu, sun koka a game da halin da suka tsinci kansu su da ma yaran nasu. Sai dai kungiyar Mojen mai fafutikar kare hakkin dan Adam da dimukuradiyya a Nijar, ta bakin shugabanta, Malam Siraji Issa, ta zargi ‘yan siyasa da sanya matasan a cikin wannan hali kuma suka yi watsi da su.

To sai dai da yake mayar da martani a kan wannan zargi, Malam Habila Rabiou, daya daga cikin masu magan da yawun kawancen adawa na CAP 21, ya ce akasarin mutanen da aka kama, ba a wajen zanga-zangar ba ne kuma zargin da ake yi wa adawar ba shi da tushe; hasalima akwai ayar tambaya a kan halaccin karbar kudin beli da hukumomi ke yi kafin sakin yaran da ke tsare.

Wani jami’in dan sanda a wurin da ake tsare da mutanen da bai so a ambaci suansa ba, ya ce tun a jiya Talata aka sallami illahirin yaran da ba su wuce shekaru 13 ba daga cikin su, amma kuma za a gurfanar da sauran wadanda shekarunsu ya haura 14 a gaban kuliya domin zartar masu hukuncin da ya dace da laifin da suka aikata.