Tasirin Covid-19 na haifar da tabin hankali

Antonio Guterres a cikin wani sabon rahoto mai taken ''cutar corona da bukatar samar da lafiyar kwakwalwa'' ya ce a yanzu cutar tana haddasa wa iyalai da al'ummomi matsalar tabin hankali. A cikin wani bidiyo da ya fitar daga birnin New York Sakatare Janar din ya ce: 

''Cutar Covid-19 ba wai lafiyar jama'a ta fili kadai ta ke tabawa ba, ta na kuma kara haifar da damuwa ga kwakwalwa. Bakin cikin mutuwar 'yan uwa da abokai da bacin rai daga rasa ayyukanyi da kebe mutane gami da kulle mutane a cikin doka suna haifar wa jama'a rashin tabbas ga makomarsu a wannan lokaci na coronavirus.''