Kotun Pakistan ta daure Imran Khan

Wata kotu a Pakistan ta samu tsohon firaministan kasar Imran Khan da aikata laifin cin hanci, ta kuma yanke masa hukuncin daurin shekaru uku a gidan kaso. Kotun ta ce tsohon firaministan ya nuna rashin gaskiya a zargin da aka yi masa tun da farko, inda ta ce ta gano yadda a tsakanin shekarun 2018 zuwa 2022 lokacin da Khan yake kan madafun iko, ya wawuri wasu kudade da yawansu ya kai kusan Euro 600,000.

Lauyan tsohon firaministan ya ce a safiyar Asabar din nan, jami'an tsaro sun kama Imran Khan din a gidansa da ke birnin Lahore. Biyo bayan wannan hukunci, Khan din ya fitar da wani faifan bidiyo, inda ya bukaci magoya bayansa su kwantar da hankalinsu.