Sinadarin bitamin C na taimakon garkuwar jiki

A dai dai lokacin da cutar Corona ke cigaba da ta'azzara, mutane na bukatar garkuwar jiki mai karfi wajen yakarta. Sai dai Jiki na bukatar isasshen bitamin da nau'in abinci mai gina jiki don yakar cutar. Batun da mutane da yawa basu damu da shi ba.

Sanya takunkumi ko kyallen rufe baki da hanci tare da bada tazara da kuma wanke hannu sune dokokin da ake amfani da su a yanzu a duniya. Sai dai ba za mu iya nade hannu mu jira  har sai an samo magani mai inganci a kan COVID-19 ko kuma alurar riga kafi ba.

Akwai wani abu wanda yafi mahimmanci yanzu fiye da koyaushe wanda kuma yakamata ya taka rawa fiye da tsabta. Wani abu wanda bai sami matsayi ba a cikin muhawarar jama'a ko kuma jerin bayanan shawarwari na gwamnati shine amun garkuwar jiki mai karfi.

Vitamin C na taka rawa sosai wajen samar da garkuwar jiki mai karfi, wanda rashinsa na iya janyo kamuwa da Covid 19. Akan dora wadanda cutar ta yi tsanani a jikinsu kan sinadran Vitamin C, cewar kwararriya akan kwayoyin halitta Isabelle Schiffer ta gidauniyar "forever Healthy"...

Ta ce "Saboda Corona, mun gano cewa akwai karancin sani game da ganyayyaki da zasu iya taimakawa rage radadin ko kuma ta'azarar cutar. Wannan bawai zai maye gurbin magungunan kimiyya ba, amma yana iya taimakawa wajen inganta shi".

Masanin ilimin halittu Adrian Gombart, wanda ya yi bincike a cibiyar Linus Pauling a Jami'ar Jihar Oregon kan mahimmancin abinci mai gina jiki ga tsarin garkuwar jiki, ya so canza wannan matsayi.

Tare da abokan aiki, ya samar da takardun da ke dauke da takaitattun bayanan sakamakon bincike kan abinci mai gina jiki da tasirinsu akan tsarin garkuwar jikin dan adam. Wadanda zasu iya zama karin hanyoyi na yaki da kwayar cutar Corona.

A wannan yanayi da ake ciki a cewar Isabelle Schiffer, samun nau'oi na kayan abinci da ke da sindran gina jiki su ne jama'a ke bukata...

Ta ce" Ko shakka babu a zaune take akwai magunguna na kimiyya wadanda kuma keda muhimmanci wajen kula ko kuma warkar da cututtuka. Amma kuma yana da muhimmanci a san cewar tun shekaru aru-aru da suka gabata ake amfani da ganyayyaki don neman waraka. Da yawa daga cikinsu na da abubuwan gina jiki, wasunsu  nada illa, shi yasa aka dan gudanar da bincike akansu a kimiyance, domin ganin irin gudunnmuwar da zasu bayar ga lafiya".

Ra'ayin Isabelle Schiffer da Adrian Gombart sun zo daya, kan bukatar mutane su kara mayar da hankali kan  nauo'in abinci da ganyayyaki da ma kayan marmari masu sidaran bitamin da kuma gina jiki. Maimakon mayar da hankali wajen cin abubuwa masu kitse ko maiko.

Cin abinci mai sinadarai masu gina jiki na da muhimmanci a irin wannan lokaci, saboda yanayin da ake ciki. Sinadran Vitamin C da D da Zink da Iron, duk wadanna sinadarai na gina jiki, musamman ga rukunin mutanen da ke cikin hadarin kamuwa da cutar, saboda raunin garkuwar jikinsu.