Tawagar ECOWAS ta sake komawa Nijar

Rahotanni daga Jamhuriyar Nijar sun yi nuni da cewa, wata tawaga ta kungiyar Habaka Tattalin Arzikin Kasashen Afirka ta Yamma ECOWAS ta isa birnin Yammai domin tattaunawa da sojojin da suka hambarar da mulkin shugaba Mohamed Bazoum da nufin kawo karshen dambarwar juyin mulkin kasar ta hanyar sulhu.

Hakan dai na zuwa ne kwana guda bayan da manyan hafsoshin sojin kungiyar suka kammala wani zama na kwanaki biyu domin lalubo hanyar ci gaba da matsa wa jagororin juyin mulki lamba su mika mulki ga gwamnatin farar hula.