Trump zai baiyana matakinsa kan nukiliyar Iran

Trump ya tsayar da ranar takwas ga watan Mayu a matsayin ranar da zai baiyana wa duniya matakinsa kan batun da ya tayar da hankula da ma janyo musayar zafafan kalamai a tsakaninsa da gwamnatin Iran.

Ba tun yau ba shugaban ke barazanar janyewa daga yarjejeniyar da aka cimma bayan da aka lallami Iran kan ta takaita shirin nukiliyarta, inda daga bisani kasashen duniya suka janye akasarin takunkumin tattalin arzikin da aka sanya wa kasar.

Amman bayan soma jan ragamar mulki, shugaban na Amirka ya soma sukar Iran, inda ya ce ba ta cika wasu daga cikin alkawuran da ta dauka ba, abin da ya sa yake son janye goyon bayan kasarsa. Amirka ta shiga yarjejeniyar karkashin mulkin Barack Obama.

 A watan Yuli na shekarar 2015, Iran da kasashen Jamus da Faransa da Britaniya da Chana da Rasha da kuma Amirkan suka rattaba hannu kan yarjejeniyar takaita shirin nukiliyar.

Illar daukar matakin na Trump ita ce hadarin shiga yaki a yankin Gabas ta Tsakiya mai fama da tashe-tashen hankula.