Ukraine ta musanta ikirarin Rasha kan fiton hatsi

Hukumomi a Ukraine, sun musanta ikirarin da Rasha ta yi cewa kasar ta ba da sabbin tabbacin kariya ga jiragen ruwa da ke jigilar hatsi domin farfado da yarjejeniyar nan ta safarar kayan abinci zuwa kasashen duniya.

A jiya Laraba ne dai Rasha ta bayyana cewa ta ba da tabbacin a rubuce, a shirin tattaunawar dawo da batun safarar abincin ta tekun Bahar al Aswad.

A karshen makon jiya ne Rasha ta sanar da janyewa daga yarjejeniyar da Majalisar Dinkin Duniya ta shiga tsakani cikin watan Yuli, wadda aka sanya wa hannu a Turkiyya.

Majalisar Dinkin Duniya ta sanar da cewa akwai jiragen ruwa masu jigilar kayan abinci guda bakwai da ke kan hanyar fita da hatsin zuwa sassa na duniya.