UNICEF: Yara na fuskantar barazana

Asusun kula da kananan yara na Majalisar Dinkin Duniya UNICEF ya ce baya ga matsalolin rashin ilimi da lafiya da abinci mai gina jiki da ke addabar yara, sauyin yanayi da cin zarafi ta yanar gizo na cikin manyan kalubale da ke shafar kananan yara a sassa daban-daban na duniya.

Cikin shekaru 30 an samu raguwar mace-macen kananan yara kasa da shekaru biyar da kusan kashi 60 cikin 100, yara da dama na zuwa akalla makarantar firamare kuma kasashe da dama sun amince da dokokin kare kananan yara.