Za´a katse shawarwari tsakanin EU da Iran akan shirinta na nukiliya

Kungiyar Tarayyar Turai ta ce zata dakatar da tattaunawar da take yi da Iran akan shirinta na nukiliya da ake takaddama akai. Wani jami´in diplomasiya a birnin Brusels ya fada cewa ministocin harkokin wajen kungiyar ta EU zasu gana a Luxemburg a ranar talata mai zuwa inda a hukumance zasu ayyana katse zama shawarwarin da Iran wanda suka ce bai haifar da wani sakamako ba. Ministan harkokin wajen Jamus F-W Steinmeier ya tofa albarkacin bakinsa a kan wannan batu yana mai cewa.

“Abin da ke faruwa a yanzu shi ne da farko ba zamu koma kan teburin shawarwarin ba. Saboda haka babu wani dalili da zai sa a hana kwamitin sulhu yin zama na musamman akan batun. Ba wani abin boyo a nan musamman dangane da matakin farko na sanyawa Iran takunkumi. Na biyu kuma shine taron ministocin harkokin wajen EU a London ya nunar da cewa hakan ba shi ne karshen kokarin warware wannan rikici ta hanya diplomasiya ba.”