Ким: Нуклеарно оружје доколку се наруши суверенитетот
4 октомври 2024
Севернокорејскиот лидер Ким Јонг Ун се закани дека ќе употреби нуклеарно оружје доколку непријателски сили го нарушат суверенитетот на земјата. Тој, исто така, го опиша јужнокорејскиот претседател Јун Сук Јеол како „ненормална личност“ која ја загрозува регионалната безбедност и мир, објави севернокорејската државна новинска агенција КЦНА. Ким ги дал своите изјави во средата (2.10) во камп за обука на специјалните сили на севернокорејската армија.
На почетокот на неделава, јужнокорејскиот претседател Јун се закани дека севернокорејска употреба на нуклеарно оружје ќе значи крај на режимот. „Ако Северна Кореја се обиде да користи нуклеарно оружје, ќе се соочи со решителен и огромен одговор од нашата војска и јужнокорејско-американскиот сојуз. Овој ден ќе биде крај на севернокорејскиот режим“, рече Јун во својот говор на Денот на националните вооружени сили во вторникот.
Во септември, севернокорејскиот лидер Ким Јонг Ун за првпат претстави постројка за облагородување ураниум и зборуваше дека сака „експоненцијално“ да ги зголеми залихите на нуклеарно оружје. Стокхолмскиот мировен институт Сипри проценува дека Северна Кореја има околу 50 нуклеарни боеви глави. Сепак, ова е само груба проценка, точната бројка не е позната. Земјата, поради нејзината нуклеарна програма, е под санкции и забрани за увоз. Последната позната нуклеарна проба се случи во 2017 година.