Германската влада усвои „Дигитална агенда“

Германската влада сака да ја доведе земјата до водечка позиција при изградбата на брзи интернет врски, нивната безбедност и отворањето нови интернет-фирми.

Сојузната влада ја усвои „Дигиталната агенда“ со која, покрај другото, се предвидува до 2018 година со брз интернет да биде покриена целата површина на државата. Бројот на новоформирани фирми од ИТ-браншата од сегашните 10.000 треба да порасне на 15.000 годишно. Паралелно е предвидено зголемување на безбедноста на врските. За подобра заштита на стопанството од сајбер-напади владата уште вчера (19.08) предложи посебен закон.

Плановите во Берлин ги претставија сојузниот министер за економија Зигмар Габриел, министерот за внатрешни работи Томас де Мезие и министерот за сообраќај и дигитална инфраструктура Александер Добринт.

Во изградбата на брз интернет во планот на владата приоритет имаат слабо покриените селски региони. Покриеноста во нив изнесува 20 проценти, додека во градот е 80 проценти.

Габриел призна, во концептот нема одговор на сите прашања.

„Дигиталната агенда треба да биде повик на дебата за стратешката програма, таа не е програма за субвенционирање“, истакна тој.