انځوریز رپوټ: لیمو ډیرې ګټې لري، خو دلته یي یو څو ګټو ته اشاره شوې

په لیمو کې موجود مواد بکتریاوې لمنځه وړي. د دې ترڅنګ د لیمو اوبه د خوړو په هضمولو کې هم مرسته کوي. د لیمو اوبه په کولمو کې موجود مضره بکتریاوي وژني او له ادرارو سره یي له بدن څخه خارجوي. لیمو د خیټې او کولمو د روغتیا په برخه کې مهم رول لوبوي.

په المان کې د بوخم پوهنتون څیړونکو معلومه کړې ده چې د لیمو اوبه د سرطاني حجرو د زیاتیدو په مخنیوي کې هم مرسته کوي. سربیره پر دې دا د ګردې یا پښتورګو د ناروغیو له پاره هم ګټور بلل کیږي. دا په پښتورګو کې د تیږې د جوړولو پروسې په مخنیوي کې هم مرسته کوي.

سهار په ګرمو یا تړمو اوبو کې د لیمو د څو څاڅکو ګډول او بیا یي د څښلو ډیرې ګټې ښودل شوي دي، خو سربیره پر دې یو بالغ انسان باید په ورځ کې له ۸ تر ۱۰ ګیلاسه پورې اوبه هرو مرو وڅښي. د لیمو اوبو یا شربت د خوږولو له پاره په کې د بورې پر ځای شات هم ورګډولی شئ.

په خوړو کې د سبزیجاتو او میوو مقدار په زیاتولو او د غوښې او شکر یا خواږه لرونکو موادو په کمولو سره هم د وزن کمولو سره مرسته کولی شئ. تاسې کولی شئ چې په سلات یا نورو خوړو کې د لیمو اوبه وزبیښئ. د ویټامین سي سربیره له دې څخه بدن پوتاشیم هم ترلاسه کوي چې د عصبي سیستم، زړه او عضلو په سمه توګه کار کولو کې مرسته کوي.

په لیمو کې داسې خصوصیتونه هم موجود دي چې له امله یي جُلد یا پوستکی تر ډیره وخته ځوان پاتې کیدلی شي. سربیره پر دې د مخ د داغونو په لیري کولو کې هم مرسته کولی شي.

د وزن کمولو په پروسه کې نه یوازې په بدن کې موجود د اضافي غوړ، بلکې د یو شمیر نورو غیر ضروري موادو اخراجول هم اړین وي. څیړنو ښودلې ده هر څومره چې په بدن کې اضافي مواد کمیږي، په هم هغه اندازه د انسان وزن هم کمیږي. ښکاره خبره ده چې بی له ورزش او د خوړو پر مهال د کم کالوري خوړو پرته په وزن کې کوم تغيیر نه رامنځته کیږي.