د خوشاله ژوند تیرولو له پاره لس لارښوونې

د انسان په ژوند کې د خوښیو په ډیریدو کې اړیکې تر نورو ډیر مهم رول لري. هغه خلک چې پراخې او غښتلې ټولنیزې اړیکې ولرې تر نورو ډیر خوشاله، د ښه روغتیا خاوندان او ډیر ژوند کوي. له کورنۍ او ملګرو سره نږدې اړیکې د مینې، هدف د ملاتړ سبب کیږي او په انسان کې د خپل ځان د ارزښت احساس را ژوندی کوي. په ژوند کې د خوښیو له پاره د نویو اړیکو جوړول او غښتلي کول مهم رول لري.

زموږ د خوښیو له پاره یو څه چې ډیر مهم دي هغه نورو ته پاملرنه ده. له نورو کسانو سره مرسته نه یوازې د هغوی له پاره ښه دي، بلکي له اخلاقي پلوه ښه کار دی او د دې سبب ګرځي چې موږ د خوښۍ او د ښې روغتیا احساس وکړو. د نورو لاس نیوی هم د خلکو ترمنځ غښتلې اړیکې رامنځ ته کوي. پیسې مهمې نه دي، موږ کولی شو یو چاته خپل وخت، نظر او انرژي ورکړو نو له همدې کبله که غواړئ ښه احساس ولرئ، ښه کارونه وکړئ.

زموږ بدن او ذهن سره نښتي دي. فعالیت موږ خوشاله کوي او زموږ روغتیا ته هم ګټور دی. فعالیت زموږ وضعیت ښه کوي او انسان له روحي فشاره ساتي. لازمه نه ده چې درانه کارونه وکړئ. ډیرې ساده لارې شته چې هره ورځ مو د منفي انرژۍ د مصرف سبب ګرځي. یوازې قدم وهل او په کافي اندازه خوب کول هم د انسان روغتیا ته ګټور دي او بلاخره د انسان د خوښۍ سبب ګرځي.

د راتلونکي له پاره ښه احساس لرل هم د انسان د خوښۍ سبب ګرځي. موږ ټول په ژوند کې هدفونو ته اړتیا لرو کوم چې موږ دې ته اړ کوي چې په هکله یې زیار او فکر وکړو. که چیرته وغواړو چې ناممکن کارونه وکړو، دا مو له روحي پلوه تر فشار لاندي راولي. داسې اهداف باید وټاکل شي چې د لاسته راوړلو وړ وي او زموږ ژوند ته یو مثبت لید لوری وربخښي. او کله چې دغه هدفونه ترلاسه شي، انسان د خوښۍ احساس پیدا کوي.

آیا کله مو احساس کړۍ چې په ژوند کې مو نیمګړتیاوي شته؟ ښه نو ښه خبر دا دی چې نیمګړتیاوې په ژوند کې وي! موږ باید توقف وکړو او هرڅه ته پام وکړو. هیله مندي او له چاپیریال څخه خبرتیا، لکه کله نا کله کار ته پلي تګ کول، د ژوند په ټولو برخو کې ښه ثابتیږي. دا مو له تیر وخت څخه حاضر وخت ته راولي او د راتلونکي په هکله مو له اندیښنو ساتي. نو له همدې امله له هرې ورځې باید ډیره استفاده وشي.

مثبت احساسات لکه خوښي، درنښت، ویاړ، قناعت په ژوند کې خوږوالی ډیروي. خو بیا هم موږ باید د ژوند د هسکو او ژورو په هکله خوشبین اوسو ځکه دا په هر وضعیت کې پر ښه اړخ باندي زموږ د تمرکز لامل ګرځي. دا دقیقا هماغه د نیمايي تش او نیمايي ډک ګیلاس تیوري ده، چې مثبت فکر لرونکي ورته د ډک ګیلاس او منفي فکر لرونکي ورته د نیمايي تش ګیلاس فکر کوي.

زده کړه په مختلفو مثبتو لارو زموږ پر روغتیا مثبت اغیز کوي. دغه څخه موږ نویو نظریو ته ځیر کوي او زموږ سره مرسته کوي چې لا ډیر کنجکاو او بوخت شو. سربیره پر دې دا انسان ته د لاسته راوړني احساس بخښي او پر ځان اعتبار زیاتوي. کولی شو له نورو ملګرو سره خپل مهارتونه شریک کړو، په یوه کلب کې نوم لیکنه وکړو، د موسيقۍ د آلو زده کول، د نوې لوبې زده کول او ډیر نوي شیان انسان ته خوښۍ وربخښي.

موږ ټول د روحي فشار، بايلل، ناکامۍ او په ژوند کې بدې پیښې تجره کوو. خو دا چې دغو پیښو ته څه راز عکس العمل ښیوو، دا په اصل کې زموږ پر ژوند ډیر اغیز کوي. موږ ډیر وخت نه پوهيږو چې موږ ته پيښيږي، خو دا کولی شوی چې د یوې پیښې په هکله خپل عکس العمل انتخاب کړو. په عمل کې دا ساده کار نه دی خو څیړنې ښيي چې زړورتوب هغه څه دي چې د نورو هنرونو په څیر زده کیدلی شي.

هیڅوک پوره نه دي. خو موږ ډیر وخت ځان له نورو سره پرتله کوو. موږ په دې اندیښمن کیږو چې څه نه لرو او پر دې فکر نه کوو چې موږ په ژوند کې څه لرو او دقیقاً همدغه څه خوښۍ له منځه وړي. د خپل ځان منل او پر خپل ځان مهربانه کیدل د ژوند خوند ډیروي. زموږ سره دا هم مرسته کوي چې دا ومنو چې موږ څه یوو او څه لرو.

هغه خلک چې په خپل ژوند کې هدف لري، هغوی د نورو په نسبت خوشاله ژوند لري. دوی همدا راز کم روحي فشار تجربه کوي. خو پوښتنه دا ده چې د ژوند هدف او معنی چیري موندلی شو؟ ممکن د ژوند هدف او معنی زموږ په مذهب او دین کې وي یا ممکن په نورو برخو کې وي، لکه کورنۍ او کار او داسې نور. خو د دې پوښتنې ځواب د هر انسان له پاره توپير کوي.