د نړۍ لنډ خبرونه په متن او انځور کې

د آلمان صدراعظمه انګلا مېرکل غواړي چې د خپل ګوند، سي دي يو د مشرۍ او د صدارت د دندې له پاره ځان بيا کانديد کړي. دا خبره ۶۲ کلنې آلمانۍ سياستوالې مېرکل د «سي دي يو» ګوند په مرکزي دفتر کې کړې ده چې خبري اژانسونه يې د ګوند له خوا خبر شوي دي. په تېرو څو ورځو کې د اتحاد د ګوندونو ډېرو سياستوالو داسې انګېرلي ول چې هغه به د دواړو دندو له پاره بيا کانديديږي.

په هند کې د اورګاډي د يوه سخت ناورين له کبله لږ تر لږه ۹۶ انسانان وژل شوي دي. څه باندې ۲۰۰ کسان ټپيان شوي هم دي چې د ۷۵ تنو روغتيايي حالت خورا نازک دی. دغه خبره د اوتار پرادېش د آيالت پوليسو تائيد کړې ده. د هغوی د څرګندونو له مخې دغه ټرين د سهار په درېو بجو د پوکرايان کلي ته څېرمه چپه شوی دی چې په پايله کې يې له ۲۳ ډبو څخه ۱۴ له پټليو څخه اوښتي دي. درې ډبې په بشپړه توګه ويجاړې شوې دي.

د امریکا د متحده آيالاتو د راتلونکي ولسمشر په توګه د ټرمپ انتخاب په پېرو کې د آسيا پاسيفيک د اقتصادي ټولنې، اپېک، پر سرمشريزې باندې سيوری غوړولی دی. د ټرمپ په واسطه د امريکا له خوا د آزادې سوداګرۍ رد ډېر غړي هېوادونه اندېښمن کړي دي. د چين ولسمشر، شي د پروتېکسيونيزم سره مخالفت وښود او د چين د اقتصاد د لا پرانيستلو ژمنه يې وکړه. شي وويل چې هېواد به يې په نړيوالتوب يا ګلوبلايزيشن کې ونډه واخلي.

د تېرو ورځو له هوايي بريدونو وروسته اوس د سوريې په شمالي حلب ښار کې ښايي د ټولو لويو کلينيکونو روغتيايي زېربنا ړنګه شوې وي. تر ټولو آخر د سوريې د ډاکترانو د يوې ټولنې په قول د کلابند شوي دغه ښار په ختيځ کې يو روغتون کابو په بشپړه توګه ويجاړ شوی دی. سره صليب د برق او د اوبو د سيستم د غير فعاليدو څخه خبرداری ورکړی دی. د امريکا متحده آيالاتو پر دغه ستر ښار باندې پر له پسې بريدونه غندلي دي.

جنوبي کوريا ولسمشره، پارک ګېون هيې، د دغه هېواد د لويې څارنوالۍ په اند د يوې اوږدمهالې همکارې د اداري فساد په افتضاه کې د ښکېلتيا پړه پر غاړه لري. پلټونکي پر پارک بادې تور لګوي چې ښايي د خپلې ملګرې، چوي سون سيل، سره يو ځای دې په دغه بډو کې ښکېله اوسېدلې وي. پر چوي باندې حقوقي پلټنې پيل شوې وې ځکه چې له ولسمشرې پارک سره د اړيکو له کبله يې د خصوصي بنسټونو له پاره بسپنې ټولې کړې دي.

په فرانسه کې محافظه کاران د يکشنبې په ورځ د ولسمشريزو انتخاباتو له پاره خپل کانديد نوموي. د مخکښانو په توګه پخواني صدراعظمان، الن ژوپې، او فرانسوا فيلون او همداراز پخوانی ولسمشر، نيکولا سارکوزي، ټاکنو ته ولاړ دي. دا لومړی ځل دی چې مخافظه پال خوځښت خپل نوماند د مقدماتي او پرانيستو ټاکنو له لارې نوموي چې ټول غړي پکې خپله رايه ورکولای شي.

په هايتي کې نن د يو کال ځنډ سره نوی ولسمشر انتخابيږي. په مخکښانو کې د پخواني صدراعظم، مارتېلي، له خوا حمايه کېدونکی کانديد، ژوېنول مويسه، او د اپوزيسيون سياستوال، جود سيلېستين، شمېرل کيږي. ټول ټال ۲۷ کانديدان انتخباتو ته ودريږي چې دويم پړاو يې د جنورۍ مياشتې په پای کې تر سره کيږي. په اکتوبر مياشت کې مويسه په لومړي پړاو کې تر ټولو زياتې اخيستې وې، سيلېستين دويم ځای نيولی وو.