د نړۍ مهم خبرونه په متن او انځور کې

د آلمان د کډوالۍ او مهاجرو ادارې سږ کال په کليسا کې د پناه اخيستنې تقريبا ټول موارد رد کړي دي. د فونکه رسنيز ګروپ د راپور په حواله دغې ادارې د اپريل مياشتې تر پای پورې يوازې په دوو مواردو کې کليسا کې د کډوالو پناه ومنله او اجازه يې ورکړه چې په آلمان کې رسمي د پناه غوښتنه هم وړاندې کړي. خو له بلې خوا يې بيا ۱۴۵ د رد جوابونه جاري کړي دي.

د آلمان د بهرنيو چارو وزير، هايکو ماس، له عراق څخه په روانو سياسي کړکېچونو کې د سړې سينې ساتلو غوښتنه کړې ده. نژدې ختيځ ته د خپل څلور ورځني سفر په دويم تمځای بغداد کې ماس ټينګار وکړ چې د خليج سيمې ثبات له پاره اړين ديالوګ او خبرې اترې بايد دوام پيدا کړي، آن له ايران سره. د دوشنبې په ورځ به د آلمان دغه مهم ديپلومات د ايران د بهرنيو چارو په وزارت کې له خپل سيال جواد ظريف سره د خبرو له پاره هم وويني.

چارواکو د شنبې په ورځ ويلي چې د افغانستان په غور ولايت کې وسله والو طالبانو لږ تر لږه ۱۴ تنه ولسي پاڅون کوونکي وژلي دي. زياته شوې چې يو شمير کسان ټپيان شوي هم دي. د غور د ولايتي شورا غړيو فضل الحق احسان او عبدالبصير قادري ويلي چې په دولتيار ولسوالۍ کې د وسله والو طالبانو او د سيمې د اوسيدونکو ترمنځ نښتو کې نور درې کسان ټپيان شوي هم دي.

د جي ۲۰ هېوادونو د ماليې وزيرانو يو ځل بيا له انترنېټي شرکتونو څخه د ماليې د اخيستلو غوښتنه کړې ده. د فرانسې د ماليې وزير، برونو لې مېر، د جاپان په فوکووکا ښار کې د وزيرانو تر ليدنې لږ مخکې وويل چې «موږ بايد بيړه وکړو.» د هغه بريتانوي سيال، فيليپ هاموند، اخطار ورکړ چې له ګوګل، فيسبوک، اپل او له نورو داسې شرکتونو څخه د کمې ماليې اخيستل، د ډېرو خلکو له خوا بې عدالتي بلل کيږي.

له څلورو مياشتو وروسته وينزويلا له ګاونډي هېواد کولمبيا سره خپل سرحد قسما بېرته پرانيستی دی. دغه خبره نيکولاس مادورو د تويتر د لارې وکړه. اوس د دواړو هېوادونو تر منځ سوداګري او تګ راتګ بېرته ممکن شوي دي. په فبرورۍ مياشت کې ناندرئيز ولسمشر مادورو د مرستندويو موادو ورلېږلو له اعلان سره سم سرحدونه تړلي ول. دا په داسې حال کې ده چې وينزويلا له يو سخت سياسي او اقتصادي بحران سره مخامخ ده.