پاکستان کې په تبلیغي اجتماع کې د لسونو زرو کسانو ګډون
۱۳۹۸ اسفند ۲۳, جمعه
د کرونا ویروس له خپریدو څخه د مخنیوي په موخه د پاکستان حکومت د احتیاطي تدابیرو په نه پام کې نیولو سره په رائیونډ سیمه کې په پنځه ورځنۍ تبلیغي اجتماع کې د ګډون په موخه په لسونو زره عبادت کوونکي راټول شوي ول. د دې اندیښنه شته چې په دې ډول کرونا ویروس نور هم خپریدای شي.
د دغه کلنۍ تبلیغي اجتماع تنظیمونکو د پنجشنبې په ورځ د کرونا ویروس د اندیښنو پر ځای سخت باران د هغې د لغوه کیدو د علت په توګه یاد کړ. د دغه پنځه ورځنۍ اجتماع له پاره ۲۵۰ زره کسان د چهارشنبې له ورځې راهیسې لاهور ته څیرمه په کمپونو کې راټول شوي ول.
د دغه اجتماع یوه تنظیمونکي احسان الله، د جمعې په ورځ د فرانسې خبري آژانس ته وویل: «زیاتره کسان خپلو کورونو ته بیرته ستانه شوي دي، خو اوس هم لا په زرونو کسان شته. هغوی به نن ستانه شي.»
په پاکستان کې تر اوسه د کرونا ۲۱ مثبتې پيښې ثبت شوي دي، خو لا تر اوسه په دغه ویروس اخته کوم ناروغ نه دی مړ شوی. پاکستان چې څه د پاسه ۲۲۰ میلیونه نفوس لري، روغتیايي خدمات هم نیمګړي بلل کیږي.
یو شمیر هیوادونو د دغه ویروس د خپریدو د مخنیوي په موخه د بیړني وضعیت له کبله د سترو غونډو د جوړیدو او په هغې کې د خلکو د نه ګډون سپارښتنه کړې ده. ځینې هیوادونو لکه ایټالیې او فرانسې پر دغه ډول غونډو بشپړ بندیز لګولی.
پاکستان تر اوسه پورې د دغه د مخنیوي له پاره د ټول هیواد په کچه اقدامات نه دي نافذ کړي او ایالتي حکومتونو باید په دې هکله په خپله پریکړې کړی وای. د احسان الله په خبره «حکومت د کرونا ویروس له کبله له موږ څخه د اجتماع د لغوه کولو غوښتنه کړې وه خو زموږ مشرانو او تنظیمونکو پریکړه وکړه چې غونډه به د پلان سره سمه ترسره کیږي.»
د رائیونډ دغه کلنۍ تبلیغي اجتماع له څو لسیزو راهیسې ترسره کیږي.