پاکستان د افغانستان او چین د ګډې غونډې کوربتوب کوي
۱۳۹۸ شهریور ۱۶, شنبه
د شنبې په ورځ (د ۲۰۱۹م کال د سپتمبر میاشتې په ۷مه نیټه) د پاکستان د بهرنیو چارو وزیر شاه محمود قریشي د پاکستان په کوربتوب د چین او افغانستان د یوې غونډې خبر ورکړ. قریشي په خپلو خبرو کې وویل چې دغه غونډه داسې مهال رابلل شوې چې اوسمهال د امریکا په مشرۍ د افغانستان د سولې خبرې ادامه لري.
د رپوټونو په حواله د دریو هیوادونو د غونډې په اجندا کې د افغانستان د جګړې پای ته رسول او د سولې پروسه، له ترهګرۍ سره ګډه مبارزه او همدا راز سوداګري شامله ده.
د پاکستان د بهرنیو چارو وزیر قریشي په خپلو خبرو کې همدا راز زیاته کړه چې د سیمې او پاکستان امنیت په افغانستان کې د جګړې پر پای ته رسیدو تکیه کوي.
په عین وخت کې د پاکستان د بهرنیو چارو د وزارت له لوري په خپره شوې اعلامیه کې راغلي چې د دریو هیوادونو د بهرنیو چارو وزیران به په دې غونډه کې د اقتصادي پرمختګ په برخه کې همکاري هم تر بحث لاندې ونیسي.
د دریو هیوادونو ترمنځ د دغې غونډې اساس دوه کاله مخکې کیښودل شو او تر دې وړاندې په ۲۰۱۷م کال کې د دغې غونډې یو پړاو د چین په پلازمینه بیجینګ کې ترسره شوی دی. کابل بیا د دغه راز یوې غونډې کوربتوب په ۲۰۱۸م کال کې کړی وو. د پاکستاني رسنیو په حواله، د چین او د افغانستان د بهرنیو چارو وزیران پاکستان ته رسیدلي دي.