طالبانو منلې چې امریکا سره د بندیانو پر تبادلې خبرې کوي
۱۴۰۳ دی ۲۳, یکشنبه
د طالبانو د حکومت مرستيال ویاند، حمدالله فطرت، د شنبې په ورځ (د ۲۰۲۵م کال د جنوري ۱۱مه) خصوصي تلویزیون طلوع ته وويل چې امریکا متحده ایالاتو سره د بندیانو د تبادلې په تړاو په څو مرحلو کې خبرې اترې شوي، خو تر اوسه کومې هوکړې ته نه دي رسېدلي.
ورته نور: رپوټ: د بندیانو د تبادلې په هکله د طالبانو او امریکا مذاکرات
امریکاي رسنیو د روانې اوونۍ په سر کې وويل چې د ولسمشر جو بایدن مخ په ختمېمدونکې اداره په افغانستان کې د درو بندي امريکايي اتباعو د آزادولو په موخه له طالبانو سره پټې خبرې اترې کوي.
ورته نور: امریکا: په افغانستان کې بندي امریکايانو خلاصون لا هم یو لوړ لومړيتوب دی
امریکايي رسنیو ويلي چې د بایدن اداره د امریکايي اتباعو د آزادولو په بدل کې لږ تر لږه د ګوانتانامو زندان یو بندي، محمد رحیم الافغاني ازادوي.
د خپرو شوو معلوماتو پر اساس، الافغاني له ۲۰۰۸ کال راهیسې په ګوانتانامو زندان کې دی. پر هغه تور دی چې د القاعده شبکې له مشر اسامه بن لادن سره ېې نژدې اړيکې درلودلي.
ورته نور: امريکا د ګوانتانامو له زندانه ۱۱ يمني بندیان آزاد کړي