ايا ځانګړي کريم په رشتيا غاښونه سپينوي؟

غاښونه له څلورو بيلو انساجو څخه جوړ د انسان په بدن کي تر ټولو کلک جوړښت دی. دغه څلور اجزا له پولپا، دېنتين، هډوکي ته ورته د غاښونو سپينه باندنۍ برخې يا مينا او سمينت څخه عبارت دي.

پولپا د غاښونو دننه برخه ده. دغه برخه د ويني د شريانونو او عصبي حجرو سره وصل وي. د ويني د شریانونو له لاري غاښونو او اوريو ته اړين مواد رسول کيږي او په دې توګه هغوی له ناروغيو او تاوانونو ساتل کيږي. عصبي حجرې د ژوولو پر وخت د اړين فشار د راوستلو په ترڅ کي مرسته کوي.

د غاښونو هغه کريم چي غاښونه سپينوي، په اصل کي د غاښونو باندنۍ برخي ته زيان رسوي. زياتره دغه کريم په ځان کي داسي کيمياوي مواد لري چي د غاښونو هغه باندنۍ برخه چي ليدل کيږي زيانمنه سي. د دا ډول کريمو د استعمال له کبله د غاښونو باندنۍ سطحه داسي سي لکه سوهان سوې چي وي.

که د غاښونو باندنۍ سطحه يا په اصطلاح باندنی پوښ يې وسوليږي يا له منځه ولاړ سي، نو بيا تر پخوا ډېر ژر د چايو، کافې او يا مشروباتو له کبله ټپلي يا ژړ رنګ اخلي. دا ډول غاښونه بيا خپل اصلي سپينوالی د هميشه له پاره له لاسه ورکوي. ډاکټران وايي چي د انسانانو د غاښونو رنګونه بېل وي او عموماً غاښونه تک سپين نه وي. هغوی وايي تر سپينوالي يې روغتيا مهمه ده.

د غاښونو ډاکټران د غاښونو د سپينونکو کريمو له زيات استعمال څخه خبرداری ورکوي. هغوی په دې نظر دي چي دغه کريم غاښونو ته تر گټي تاوان رسوي. دا ځکه چي د نورو کيمياوي موادو تر څنګ دا ډول کريم واړه زيږه مواد په ځان کي لري چي له ريګو سره مقايسه کيدلای سي. دغه زيږه ذرات غاښونه سولوي.

څوک چي په بازار کي پلورل کېدونکي د غاښونو سپينونکي مواد او يا هم په کور کي د سوډا، ليمو اوبو او يا نورو موادو لکه تيزابي اوبو څخه د غاښونو د سپينولو له پاره کار اخلي، هغوی هم په اصل کي خپلو غاښونو ته زیان رسوي.

د غاښونو او د اوريو د روغ ساتلو له پاره يوه ښه لاره دا ده چي تر غذا خوړلو وروسته خوله په اوبو ښه ومينځل سي او په ګوته اورۍ هم وموښل سي. په زياته د خوږو تر خوړولو وروسته بايد خوله او غاښونه د دغو خوږو شيانو له پاته سوو څخه پاک کړل سي.

ښه دا ده چي څوک په کال کي يو يا دوه واري د کنټرول له پاره د غاښو ډاکټر ته ولاړ سي. هغه کسان چي د غاښو کومه ستونزه لري، هغوی بايد ژر تر ژره ډاکټر ته مراجعه وکړي.