یونیسف د ۲۰۲۵م کال له پاره د لس ميلیاردو ډالرو غوښتنه کړې
۱۴۰۳ آذر ۱۵, پنجشنبه
د ملګرو ملتونو د ماشومانو د ملاتړ صندوق یا یونیسف د بودجې غوښتنه د چهارشنبې په ورځ د دسمبر ۴مه کړې ده.
د یونیسف اجرایوي مشرې، کترین رسل، په یوه اعلاميه کې ويلي دي چې «د ماشومانو د بشري اړتیاو کچه په تاريخي توګه یوه لوړه سطحه کې ده، چې ورسره جوخت هره ورځ لا ډېر ماشومان اغیزمن کيږي.»
د فرانسې خبري آژانس د رپوټ مطابق، د وړانديز شوې پېسې به په ۲۰۲۵م کال د ۱۰۹ ميلیونه ماشومانو له پاره ابتدايي روغتيايي خدماتو ته د لاسرسي، دماغي روغتیاي خدماتو، د څښاک اوبه، تعليم، د خوارځواکۍ آزموینو، او د جنسيتي تاروتریخوالو د کمولو په برخو کې ولګول شي.
مېرمن رسل زیاته کړه: «موږ د ۲۰۲۵ کال په درشل کې اټکل کوو چې په ۱۴۶ هيوادونو او قلمرونو کې به ۲۱۳ ميلیونه ماشومان د دغه کال په جریان کې بشري مرستو ته اړتیا ولري.» هغې وویل چې دا «په حیرانوونکي توګه یو لوړ شمېر» دی.
د یونیسف ادارې د دغې بوديجې اپيل په داسې یو وخت کې کړی چې بشري فعالیتونه له یو مزمن بوديجوي بحران سره مخ دي.
دغه سازمان تېر کال د ۹ اعشاريه ۳ ميلیونه امریکايي ډالرو اپيل کړي وو.
په غوښتنه شوې بودجه کې د افغانستان له پاره تر سوډان وروسته څه باندې یو ميلیارد ډالر په نظر کې نيول شوي دي. د کانګو د خلکو جمهوريت، د فلسطين سیمه او لبنان هم د نړۍ د تر ټولو سختو بحراني سیمو په کتار کې ښودل شوي دي.
په عین وخت کې د ملګرو ملتونو د نفوس بودجې برخې (UNFPA) هم په ۷۵ هېوادونو کې د ۴۵ ميلیونو ښځو او نجونو د ملاتړ له پاره د ۱ اعشاريه ۴ ميليارد ډالرو غوښتنه کړې ده.
ياد سازمان چې د فعالیتونو یوه برخه ېې د قابلو ګمارنه ده، اټکل کوي چې په ۲۰۲۵م کال کې به ۱۱ ميلیونه حامله ښځې «فوري» مرستو ته اړتیا ولري.
د (UNFPA) اجرائيوي مشرې ډاکټرې نتالیا کنیم، په یوه اعلاميه کې ويلي دي: «په هره شخړیزه او فاجعه اې سیمه کې ښځې او نجونې له ژورو خطرونو سره مخ دي چې د دوی ژوند، رفاه او حیاتي خدماتو ته لاسرسی ګواښي.»
مېرمن کنيم ټینګار وکړ چې «له د دغي غوښتني څخه په ملاتړ سره موږ کولی شو ډاډ رامنځ ته کړو چې هېڅ ښځه د زېږون پر وخت خپل ژوند له لاسه ور نه کړي او د هرې ښځې او نجلۍ ژوند له زیانه په امان کې وي، حتی په ډېرو نازکو حالاتو کې هم.»