آلمان د کرونا په واکیسن ۷۵۰ میلیونه یورو لګوي
۱۳۹۹ اردیبهشت ۲۳, سهشنبه
آلمان د دوشنبې په ورځ (د ۲۰۲۰ کال د می ۱۱مه) دا تائید کړه چې د کرونا ویروس د پرمختګ او په پروګرام باندې ۷۵۰ میلیونه یورو مصرفوي چي شاوخوا ۸۱۲ مليونه ډالره کيږي. دغه اعلان د آلمان د تحقیقاتي چارو وزیرې انیا کارلیچېک کړې دی.
ویل شوي دي چې د دغه پيسو شا او خوا نیم میلیارد (پنځه سوه مليون) یورو به په آلمان کې د ازموینو د ظرفیت د لوړولو او باقي پاتې یې د تولید د ظرفیت له پاره ولګول شي. دغه اعلان د آلمان د صدراعظمې انګلا مېرکل په مشرۍ د کابینې د غونډې د ترسره کیدو په تعقیب وشو.
انیا کارلیچېک ویلي دي: «کله چې واکسین وموندل شي او تائید شي، دلته په آلمان او نړیواله کچه یې په پراخه اندازه د ژر تولید وړتیا باید موجوده وي.» هغې بیرته عادي ژوند ته دورګرځیدو له پاره د واکیسن جوړیدل مهم وبلل.
په پراخه کچه ازموینې
د تمویل د نوي پروګرام اصلي هدف دا دی چې کلینکي ازموینو ته دا امکان برابر شي چې له لومړي سره د زیاتو ګډونوالو سره کار پېل کړي. د کارلیچېک، په خبره روغتیايي پرسونل یا نور مهم کارکوونکي کولی شي په داوطلبه توګه په دغو ټېسټونو کې شامل شي.
په عادي ډول ازموینې په لومړي سر کې د کمو ګډونوالو سره په تدریجي ډول پیلیږي او بیا په کرار کرار دغه لړۍ پراخیږي.
آلمان د نړۍ په کچه د هغو هیوادونو په ډله کې دی چې د واکسین د ازموینو د تمویل په برخه کې ونډه اخلي. آلمان مېشته د دارو درملو جوړولو تحقیقاتي شرکتو اتحادیې د معلوماتو له مخې په ټوله نړۍ کې د واکسین جوړولو ۱۲۱ پروګرامونه تر لاس لاندې دي.
رويترز/س.ر./ا.و.ا.
زموږ له آرشیف څخه: