آلمان له روسیې څخه د تیلو واردات په بشپړه توګه بند کړل
۱۴۰۱ دی ۱۲, دوشنبه
د ۲۰۲۲م کال د فبرورۍ مياشتي پر ۲۴مه نېټه د روسېې پوځ پر اوکراین د برید له لومړیو ورځو راهیسې آلمان هڅه پیل کړه چې له دغه هیواد څخه د انرژۍ پر وارداتو خپله تکیه کمه او ان پای ته ورسوي.
د ۲۰۲۳م کال د جنورۍ مياشتي له لومړۍ نېټې څخه المان ته د روسيې د تېلو واردات په بشپړه توګه بند او د دغه هيواد یواځنی تېل ترلاسه کوونکې پایپ لاین بند شو.
اروپايي ټولنې د ۲۰۲۲م کال د ډسمبر له پنځمې راهیسې له روسیې څخه په ټانکرونو کې د تېلو پر واردولو بندیز ولګاوه. په می میاشت کې د اروپايي ټولنې په سرمشریزه کې د روسیې د تیلو د دوه پر دریمې برخې وارداتو د بندولو پریکړه هم شوې وه.
په وروستیو میاشتو کې آلمان او د ختیځې اروپا ځینې هیوادونه د دروږبا پایپ لاین له لارې د تیلو لږ اندازه ترلاسه کوله.
اوس نو په ختیځ آلمان کې یو شمیر تصفیه خوني چې تغذیه یې د روسیې تیل وه، باید د نورو سرچینو څخه د تیلو ترلاسه کولو له پاره په خپلو تاسیساتو کې بدلون ته لاره هواره کړي.
د آلمان حکومت د ختیځو ایالتونو د چارو له پاره د فدرالي حکومت ځانګړی استازی کارستن شنایدر په دې باور دی چې په دې سیمه کې د تیلو د تصفیې له پاره د سرچینو بدلون د یو چانس په توګه ارزول کیږي.
د سوسیال دیموکرات دې سیاستوال د آلمان خبري آژانس ته ویلي دي چې د تیلو د تصفیې په تاسیساتو کې د لازمو بدلونونو له پاره له عامه منابعو څخه څه باندې یو میلیارد یورو پانګونه شوې ده.
نوموړی وايي په دې توګه به موږ د روسیې پر تیلو د آلمان د ختیځو ایالتونو انحصار پای ته ورسوو او دا اقدام د آلمان د یووالي د ټینګښت پر لور یو ګام دی.
تمه کیږي چې د تیلو بندیزونه به د روسیې د ولسمشر ولادیمیر پوتین له پاره دا ستونزمنه کړي چې د اوکراین پر وړاندې جګړې سخت لګښتونه تمویل کړي.
خو د تیلو د بندیزونو ځینې منتقدین په دې باور دي چې روسیه کولی شي د خپلو خامو تیلو له پاره نوي پیرودونکي ومومي. خو په هرصورت د دې بنډیزونو اغېز به لږ نه وي ځکه چې روسیه ډېر وختونه مشتریانو ته خپل تیل په تخفیف سره وړاندې کوي.
ترمپ آلمان ته د روسیي د ګازو پایپ لاین تحریم کړی
د دروږبا په نوم د تیلو پایپ لاین په ۱۹۶۰ لسیزه کې د روسیې "ورور هیواد" ختیځ آلمان ته د تیلو د لیږدولو له پاره جوړ شوی و. اوس د دې سیمې د تصفیه کولو له پاره د اړتیا وړ تېل باید د سمندر له لارې وارد شي او همدا راز یوه برخه به یې د پولنډ د ډانسینګ بندر له لارې واردیږي.
د ختیځ آلمان دوې تصفیه خوني به د روسيې پایپ لاین له لارې د تیلو تر بنديدو وروسته به څه موده و نشي کولای چې په بديلو تيلو سره بشپړ فعاليت وکړي.
د اوکراين له جګړې مخکې د اروپايي ټولنې غړو هيوادونو په منځنۍ توګه د خپلې انرژۍ ۴۰ سلنه اړتيا له روسيې څخه پوره کوله چې آلمان بیا د انرږۍ د وارداتو په برخه کې نږدې ۵۵ سلنه په روسيې پوري تړلی وو.