د سګرتو له پریښودو سره په بدن کې کوم بدلونونه رامنځ ته کیږي؟

تر وروستي سګرت ۲۰ دقیقې وروسته د زړه ضربې او د وینې فشار بیرته خپل عادي حالت ته راځي. په سګرتو کې موجود نیکوتین سمپاتیک اعصاب تحریکوي. دغه اعصاب د زړه ضربې او د وینې فشار لوړوي.

که سړی ۱۲ ساعته سګرت دود نه کړي نو د وینې مونواکسید کمیږي او خپل طبعيي حالت ته راځي او په بدل کې یې د وینې اکسیجن لوړیږي. مونواکسید کربن د سګرتو د دود یوه برخه ده چې د ویني جریان ته داخیلیږي او په ویني کې د اکسیجن د جذبیدو مخه نیسي.

که سړی دوه ورځې سګرت و نه کاروي نو د لید او بوی حسونه یې ښه کیږي. د سګرتو دود دغه دوه حسونه تر فشار لاندې راوړي.

که سړی درې ورځې سګرت دود نه کړي نو سږي آرامیږي او نفس اخیستل اسانه کیږي. په دې وخت کې په بدن کې نیکوتین نه وي د سګرتو پریښودو نښانې لا څرګندیږي. په دغو علایمو کې د سر درد او عضلاتو خسته ګي شامله وي.

د سګرتو تر پریښودو څو میاشتې وروسته وینه ښه کیږي. د سږو ظرفیت هم لوړیږي. انسان کم ټوخیږي.

د سګرتو تر پریښودو یو کال وروسته د زړه په ناروغیو د اخته کیدو ګواښ ۵۰ سلنه راکمیږي. لس کاله وروسته د سږو د سرطان ګواښ ۵۰ سلنه کمیږي او ۱۵ کاله وروسته د دغو ناروغیو د را منځ ته کیدو ګواښ دومره وي لکه په یوه داسې کس کې چې هیڅ یې سګرت نه وي دود کړي.