د قطر نړیوال جام به د کومو لوبغاړو له پاره وروستۍ لوبې وي؟

لیونل مسي ویلي چې دا به د هغه له پاره وروستی نړیوال جام وي. دا ۳۵ کلن ستوری په دغو نړیوالو او مهمو سیالیو کې د بریا تږی دی. هغه چې په ۲۰۲۱ کال کې د ارجانتین ملي ټیم د امریکا د کوپا تر اتلولی جام ورساوه، هیله مند دی چې د قطر په نړیوال جام کې خپله ملي لوبډله ډیرو بریاوو ته ورسوي.

۳۷ کلن رونالدو اوس هم د پرتګال د ملي ټیم ترټولو غوره لوبغاړی دی. د پرتګال ملي ټیم تر اوسه د نړیوال جام په سیالیو کې کومه بریا نه لري. رونالدو چې څلور ځلې د سرو زرو توپ جایزې او همداراز د فوټبال د کلبونو په سیالیو کې مهم لوبغاړی پېژندل شوی، د قطر په نړیوال جام کې په دې هیله ګډون کوي چې دا به د نوموړي د فوټبال په ځلاندو فعالیتونو کې وروستۍ هڅه وي.

۳۰ کلن نیمار، سږکال په نړیوال جام کې د ترټولوغوره ټیمونو له ډلې څخه د یوه هیواد د ملي ټیم مشري کوي. د هغه له پاره دا درېیم ځل دی چې په نړیوال جام کې حضور لري او په دې هڅه کې دی چې د برازیل د پخواني ستورو په څېر په نړیوال جام کې د اتلولي ویاړ ترلاسه کړي. د هغه ټیم ډېر غښتلي لوبغاړي لري. له همدې کبله د خپلې لوبډلې له پاره د هغه مشري او نوښتونه د قطر په نړیوال جام کې خورا مهم دي.

۲۳ کلن کلیان امباپه، د قطر په نړیوال جام کې د اتلولي له عنوان څخه د مدافع په توګه ګډون کوي. د فرانسې ملي ټیم په ۲۰۱۸ کال کې په روسیه کې اتلولي ته ورسید. همدارنګه دا ټیم له تیر نړیوال جام را وروسته ډیرې لاسته راوړنې نه لري. امباپه د یورو ۲۰۲۰ په سیالیو کې یو پنالټي چې «برخلیک ټاکونکي وو» ونشو کړای ګول کړي او د سویس ټیم لخوا له لوبو حذف شو. هغه هیله لري چې د قطر جام به ورته ښې پایلې ولري.

د فوټبال په نړۍ کې یو له مشهورو بریدکوونکو لوبغاړو څخه هري کین په دې هیله د قطر نړیوال جام ته داخلیږي چې د انګلستان ملي لوبډله به له ډیرې مودې وروسته دغې سترې بریا ته ورسوي. انګلستان د ۲۰۱۸ نړیوال جام «یو څلورم فاینل» ته ورسید، نو د دې ټیم له پاره په وروستۍ پړاو کې له رسیدو پرته پرمختګ نه شمېرل کېږي. انګلستان له ۵۶ کلونو راهیسې نړیوال جام نه دی ګټلی.

د سینګال د ملي لوبډلې غړی او جرمني د بایرن کلب لوبغاړی سادیو مانه په داسې مهال نړیوال جام ته ځي چې د دغه کلب په لوبه کې یو څه خوږ شوی دی. دغه لوبغاړي له لاسته راوړنې ډک کال تېر کړی او د خپل هېواد له ملي ټیم سره یې د آفریقا اتلولي جام په سیالیو کې د لومړي لقب او نړیوال جام ته د لار موندلو په برخه کې ډېره مرسته کړې ده.

لوانډوفسکي په تېر نړیوال جام کې ونشو کړای د پولنډ ملي لوبډله بریا ته ورسوي، خو دا ځل له ډېرې تجربې سره هیله لري چې د ګروپي پړاو په سیالیو کې پرمختګ وکړي. په دې پړاو کې د پولنډ ملي لوبډله د ارجنټاین، مکسیکو او سعودي عربستان ټیمونو سره لوبې کوي. دا لوبغاړی چې د کلبونو په لوبو کې په ځانګړې توګه په بایرن کلب کې ډېرې بریاوي ترلاسه کړي او دا به په نړیوال جام کې د ده وروستۍ لوبه وي.

سون هیونګ مين چې د اسيا د غوره لوبغاړي په توګه پېژندل کېږي، نړيوال جام ته په دې هيله ځي چې لوبډله يې د اسيا په نړيوال جام کې برياليتوب ته ورسېږي. جنوبي کوریا په وروستي نړیوال جام کې چې په آسیا کې په لاره اچول شوی و نیمه پایلوبې ته لار موندلې وه. هغه چې د تاتنهام هاټسپر کلب له پاره لوبیږي، د انګلستان پریمیر لیګ د سرو زرو توپ له ګټونکو څخه دی او په تېر فصل کې یې ۲۳ ګولونه سر ته رسولي دي.

کوین دي بروینه په منچستر سټي ټیم کې لوبېږي، د قطر د نړیوال جام په سیالیو کې د بلجیم د سرو زرو د نسل مشري کوي. بلجیم لوبډلې په روسیه کې د ۲۰۱۸ کال نړیوال جام په نیمه پایلوبه کې ماته وخوړه او دا ځل د ښې پایلې تمه لري. ۳۱ کلن بروینه د خپلې لوبډلې مشهور ستوری دی.

د هالنډ ملي لوبډله په داسې حال کې د قطر نړیوال جام ته ځي چې په روسیه کې د ۲۰۱۸ کال نړیوال جام ته لاره موندلې نه وه. ویرجیل فن دایک د دې ټیم لوی او مهم ستوری دی او په قطر کې به د لا بریاوو له پاره هڅه وکړي.