د منگهوت له سمندري طوفان وروسته تصفیه کارۍ

ددغه سمندري طوفان له امله د فلېپین په ایتوگون ښار کی په مجموعي ډول ۶۵ کسانو خپل ژوند له لاسه ورکړی او نور کسان بیا لادرکه دي. هلته د سخت اورښت له امله د مځکی ښوییدنې په نتیجه کی د غره کیندونکو یوه سرپناه ونړیدله چې پکښي ۵۰ تنه کارگران اوسیدل.

مرسته کوونکي د بیل او کلنگ او یا هم تشو لاسونو په واسطه، هغه خټې اړوي او را اړوي چی پکښې نړیدلې ونې پرتې دي او له کاڼو او لوټو څخه ډکې دي.

په لادرکه کسانو پسې لټه دوام لري. د ایتوگون ښاروال ویکتوریو پلنگدان وایي « موږ به خپل کار ته همداسي دوام ورکو تر څو ټول قربانیان راویستل سي.» خو په دې اړه یې نوره خپله هیله له لاسه ورکړې چې کوم څوک به ژوندي پاته وي.

له مځکې ښویدنط څخه وروسته د بولدوزرانو کارول ناممکن بریښي. د مځکې زیاته برخه ډیره «نرمه»سوې ده او د ثقلیو وسایلو طاقت نه لري. په داسي حال کی چی بولدوزورونو ته سخته اړتیا سته تر څو دا هر څه منظم او تصفیه سي.

یو داوطلب کس وایي چې د پورته او کښته لارو له امله د مرسته کوونکو سمبالول ډیر سخت دي. علاوه پر دې د رهنما څراغونو کمښت لیدل کیږي تر څو مرسته کوونکي وکولای سي په شپه کی هم خپلې لټی ته ادامه ورکړي. د یوه رپوټ له مخی ساحلي څارونکي غواړي د قرباینانو د لټولو له پاره خپل ځانگړي سپي د ایتوگون ښار ته واستوي.

ښار وال بیا د مځکې ښویدنې علت غیرقانوني غر کیندنه بولي. د هغه په خبره دغه سیمه په اصل کی نوره پریښودل سوې وه خو بیا هم ځینو کان کیندنو له هغې څخه کار اخیسته.

د چین جنوبي برخه هم سخت طوفان اغیزمنه کړې ده. د طبیعی پیښو په وړاندی د مبارزې د ادارې په حواله د دغه طوفان له امله څلورو کسانو خپل ژوند له لاسه ورکړی. درې تنه د ونو د چپه کیدو او یو تن د ودانۍ د نړیدو له امله له منځه تللی دی.

دلته په هانگ کانگ کې هم ، نوموړي طوفان ځینی نښې له ځانه پرې ایښي دي. په دغه څو میلیوني ښار کی ژوند تقریباً په ټپه دریدلی وو. د عینی شاهدانو په حواله حتی ځینې لوړې ودانۍ هم په لړزیدو راغلي وې.