د نړيوالو پوليسو مشر د چین د سفر پرمهال لادرکه شوی
۱۳۹۷ مهر ۱۳, جمعه
د انترپول یا د نړیوالو پولیسو د مشر مینګ هونګوي میرمنې د جمعې په ورځ خبر ورکړ دی چې د فرانسې له لیون ښار څخه د چین پر لوري تر تګ وروسته يې له ۶۴ کلن خاوند سره اړیکه پرې شوې ده. د انترپول یا نړیوالو پولیسو مرکزي دفتر په فرانسه کې دی.
د فرانسې چارواکو ویلي دي چې مینګ، چین ته نه دی رسیدلی. په چین کې د مینګ د سفر د مهالویش په هکله معلومات او دا چې د هغه ماينې ولي تر اوسه پورې د هغه د لادرکه کیدو موضوع پټه ساتلې وه، معلومات نه شته.
انترپول یا نړیوالو پولیسو د یوې اعلامیې په خپرولو سره ویلي دي چې دوی د مینګ د لادرکه کیدو له راپورونو خبر ول. په اعلامیه کې ویل شوي دي چې د نړیوالو پولیسو مشر د دې سازمان د عملیاتو مسئول دی او د دې سازمان مشر مینګ د نړیوالو پولیسو د عملیاتو مشري نه کوي.
د مینګ د لادرکه کیدو له پاره د پلټنو خبر په چین کې د یوې اونۍ رخصتیو پرمهال رابرسیره شو. په عین وخت کې په بیجینګ کې نه هم د بهرنیو چارو وزارت چارواکو او نه هم د دې هیواد امنیتي وزارتونو په دې هکله تلیفونونو او د فکس له لارې پوښتنو ته ځواب ویلي دی.
مینګ هونګوي د ۲۰۱۶م کال په نومبر میاشت کې د نړیوالو پولیسو د مشر په توګه وګومارل شو او په ۲۰۲۰م کال کې یې د ماموریت موده پای ته رسیږي. مینګ تر دغه مسئولیت مخکي د ۲۰۰۴م کال راهیسې د چین د عامه امنیت د وزیر [د چین د ملي پولیسو د ځواکونو] پر مرستیال سربیره د هغه هيواد د امنیتي سکتور په ډيرو برخو کې کار کړی دی. سربیره پر دې هغه د چین د سمندري ځواکونو د ځينو څانګو د مشرتوب پرمهال په انترپول کې هم مهاله دنده درلوده.