سنګاپور: غښتلی اقتصاد لرونکی ښکلی هیواد او سوله ایز ګډ ژوند

زمری د سنګاپور له مهم نښو څخه دی. په سانسکریت کې زمري ته «سینګا» وايي. سنګاپور بیا غښتلي او قوي ته ورته د زمري په معنی دی. د «مرلیون» مجسمه چې سر یې د زمري او لکۍ یې د ماهي یا کب ده، په سنګاپور کې ډیر مشهوه ده.

سنګاپور د خپل نوم له کبله د هغو مسافرو د خوښې یو له هیوادونو څخه دی چې د پرواز پر مهال غواړي دلته یو لنډ توقف وکړي. د دې انځور په ښي اړخ کې لا هم د استعمار د دورې ځینې ودانۍ لیدل کیږي. په چپ اړخ کې بیا د سنګاپورې نوې څیره لیدل کیږي.

د سنګاپور د ودانیو په جوړولو کې ښکلا او هر راز ظرافت تر سترګو کیږي. د مارینا بې سندز هوتل په خپله هم د دې ښار یو له مشهورو ودانیو څخه دی. دغه هوټل ۲۰۰ متره لوړوال لري او پر سر یې یو پارک هم جوړ شوی دی.

دا د مارینا بې سندرز هوټل پر سر باندې جوړ د لامبو حوض دی. په دې توګه نو د دې هوټل میلمانه کولای شي چې د هوټل پر۵۷ پوړ تر پرانیستي آسمان لاندې لامبو وکړي. هیره دې نه وي چې یوازې د هوټل میلمانه دلته د تګ اجازه لري او د هوټل کرایه هم ډیره لوړه وي. د هوټل د یوې شپې کرایه د یوه کس له پاره شاوخوا ۳۰۰ یورو ده.

سنګاپور له ګڼه ګوڼۍ یو ښار دی چې شاوخوا ۶ میلیونه نفوس لري، خو په عین حال کې د آسیا یو له زرغونو ښارونو څخه شمیرل کیږي. دغه پارک په دې ښار کې د زرغونیزې پروژې تر ټولو تازه رغول شوی پارک دی. د ونو ترمنځ رغول شوې هوايي پلونه د دې ۱۰۱ هکتاري پارک تر ټولو جالبه برخه ده. په ځانګړې توګه د شپې پرمهال چې کله دغه مصنوعي ونې خپله رڼا خوروي، نو هرڅه له رنګونو ډک وي.

په دې پارک کې دوې سترې ګلخانې هم رغول شوي. له ګلانو او بوټو ډکه دغه ودانۍ د ګینس په نړیوال رکارډ کې د نړۍ تر ټولو د سترې ښیښه يي ګلخانې په توګه ثبت شوې ده.

د دې ودانۍ په جوړولو کې هم له طبعیت څخه الهام اخیستل شوی دی. په دې ودانۍ کې د تیاترونو یوه مجموعه جوړه شوې چې د ۲۰۰۰ کسانو د ځایولو ظرفیت لري. همدا راز پر یوه ستر بازار سربیره دلته د کنسرتونو یو سالون چې د ۱۶۰۰ کسانو ظرفیت لري.

په سنګاپور کې د سیلانیانو یو له بوختیاوو څخه د توکو رانیول دي. د ښار په مختلفو برخو کې له عصري څخه هم ډیر عصري ودانۍ او بازارونه رغول شوي او هره ورځ له ۱۰ نه تر ۱۰ د شپې پورې پرانیستي وي.

په سنګاپور کې مسلمانان، بودایان، هندوان او مسیحیان په سوله ایز چاپیریال کې ژوند کوي. د «چین ښارګوټي»، «کوچني هند» او یا هم د «عربو پر سړک» قدم وهل هم خپل ځانګړی خوند لري په ځانګړې توګه کله چې ځانګړي مراسم هم ادامه ولري. په دې انځور کې د چین د نوي کال مراسم لیدل کیږي. په دې ټاپو کې د ټولو ادیانو پیروان دوه ورځې عمومي رخصتي لري.

ټول سنګاپوریان پرته له دې چې د کوم قوم او یا مذهب پیروان دي، پر یوه موضوع ټول متفق دي او هغه ښه خوراک دی. د دفترونو کارکوونکي د غرمې پرمهال په بې صبرۍ سره د غرمې د ډوډۍ انتظار باسي ترڅو بیرون ووځي او د سړکونو پر غاړې بیلابیل خواړه وخوري.