له کرونا ويروس څخه څرنگه ځان ساتلی شو؟

دا ثابته شوې نه دی چې د پزې او خولې ماسک سړی په اغيزمنه توگه له يوه ويرس څخه ساتلی شي. يوازې ويل کيږي چې ماسکونه احتمالاً يو څه ميکروبه خولې او پزې ته د داخليدو ایسارولی شي. دا همدا راز د دې مخه نيسي چې انسانان خپله خوله او پزه لمس کړي چې انسانان دا کار په غیر شعوري توگه کوي. که يو څوک په رښتيا ناروغ وي نو دا ډول ماسکونه د دې مخه نيسي چې نور په ميکروب ککړ کړي.

د روغتيا د نړيوال سازمان په هغه نوملړ کې چې د ميکروبي ناروغيو څخه د ځان ساتنې لارښوونې یې پکې کړي دي، د پزې او خولې د ماسک يادونه نه ده شوې، بلکې د نوملړ په سر کې راغلي چې بايد سړی خپل لاسونه په څو ځلي پريمنځي. د روغتيا نړيوال سازمان د الکهولي دواو لکه په روغتونو کې چې کارول کيږي، د استعمال سپارښتنه کړې ده.

تر ټولو ساده او آسانه لاره په صابون او اوبو د لاسونو پريمنځل دي. خو دې ته مو بايد پام وي چې لاسونه مو په اساسي توگه پريمنځئ.

ډاکتران لارښوونه کوي چې د ټوخي او پرنجي پر وخت خپله خوله او پزه په خپله مټه کيږدئ او يا هم له دستمال څخه کار واخلئ او بيا دغه کاغذي دستمال وغورځوئ. خو د کميس او يا کرتۍ غورځولو ته اړتيا نشته. هغه چې پاک پريولل شي، کافي ده.

يوه بله لارښوونه دا ده چې له هغه چا سره چې تبه او يا ټوخی لري، له نزدې تماسه ډډه وکړئ. که مجبور ياست چې ور نزدې شئ نو بيا د ځان د ساتلو له پاره اضافي گامونه پورته کړئ.

که چېري تاسې تبه لرئ، توخيږئ او په تنفس کې ستونره لرئ نو ډاکتر ته ورشئ. عامه ځايونو ته له ورتگ ډډه وکړئ څو نور ککړ نه کړئ. خپل ډاکتر ته دا هم ووایې چې کومو ځایونو ته سفرونه کړي ول.

د داسې سيمو د څارويو او کبانو په بازارونو کې چې د کرونا ويرس د خپريدو قضیې پکې ليدل شوي وي، د څارويو سره له مستقيم تماس ډډه وکړئ. هغو ځايونو او شيانو ته لاس مه ور وړئ چې دغه ژوي ورسره په تماس کې شوي وي.

غوښه ښه پخه کړئ. د څارويو د خامو توليداتو له خووړولو ډډه وکړئ. اومې غوښې، شيدو او د نورو حيواني توليداتو سره بايد ډېر پام وشي او د پخو شيانو سره بايد گډ نه شي. دا کار د ناروغيو د خپريدو مخه نيولی شي.