ټوله اروپا تړل شوې

د فرانسې حکومت د تیرې پنجشنبې په ورځ په ټول هيواد کې خلکو ته په کورونو کې د پاتېدو لارښوونه وکړه. له دې کبله په نړۍ کې ډېر شهرت لرونکی ښار پاريس هم خاموشه شوی دی. د پاريس اوسيدونکو ته ويل شوي چې بې ضرورته له کورونو ونه وځي. پاريس هغه ښار دی چې قهوه خانې یې په جنګونو کې هم کله نه وې تړل شوې.

د آلمان صدراعظمې د يکشنبې په ورځ د سختو اقداماتو اعلان وکړ. پر کرونا ويروس د کنترول موندلو په نهه فقريي پلان کې دا خبره هم راغلې چې په عامه ځايونو کې تر دوو زيات کسان نه شي سره یوځای کیدلی. خلکو ته ويل کيږي چې د کوويد- ۱۹ ويروس د مخنيوي په موخه له يو بل سره تر يو نيم متر زيات واټن رعايت کړي. د آلمان وګړي د دې نړيوالې وبا په اړه جدي ښکاري او له همدې کبله په برلين کې هم پر سړکونو چپتيا خپره ده.

د کرونا ويروس د مخنيوي په موخه د آلمان حکومت د بهرنيانو پر داخليدو هم يو څه بندیز وضع کړی دی. د دې ګام له کبله د هيواد تر ټولو مصروف د فرانکفورت هوايي ډګر ګنه ګونه هم کمه شوې او پر سړکونو هم ترافيک ډېر کم شوی دی.

د مساعت له لحاظه د آلمان په تر ټولو ستر ایالت کې هم تیره اوونۍ بشپړ بندیز اعلان شو. د ویروس د مخنيوي په موخه به په دغه ایالت کې دوې اوونۍ دغه حالت حاکم وي. د ایالت په مرکزي ښار مونشن کې هم د ورځني ژوند چارې په ټپه درېدلي دي.

په بريتانيا کې هم ټول رستورانتونه، قهوه خانې، کلبونه او د ټولنیز تماس نور ټول ځايونه تړل شوي دي. لومړي وزير بورس جانسن له خلکو غوښتي چې د غير ضروري سفر او تماسونو څخه ډډه وکړي. په دې توګه د لندن تاريخي متروګانې خالي دي.

په اروپا کې د کرونا ويروس تر ټولو زیات زيان ايټاليا ته اوښتی دی. په دې هيواد کې د مارچ له لسمې نیټې راهيسې بندیز دی او خلکو ته په کلکه ويل شوي چې په کورو کې پاته شي. د میلان په څېر نور ستر ښارونه د ويروس د مخنيوي د اقداماتو له کبله بې ګڼې ګوڼې شوي دي.

د ايټاليا په شمال کې د نړیوالې وبا د مخنيوي په موخه د سختو اقداماتو له کبله د واتیکان ښار هم له يو شمير محدوديتونو سره مخامخ شوی دی. د عيسويانو د دې مذهبي ښار سينت پيترز مشهور ميدان هم د خلکو پر مخ تړل شوی دی او په پام کې ده چې د ايستر اختر پر وخت هم ستر مراسم ترسره نه شي.

په اروپا کې تر ايټاليا وروسته وضعه تر ټولو ډېره په هسپانیا کې خرابه ده. د هسپانيا حکومت د مارچ تر یولسمې نیټې پورې په ټول هيواد کې بيړنی حالت نافذ کړی. په هسپانيا کې د بارسلونا او مادريد ښارونه تر ټولو ډير اغيزمن دي.

د اتريش د حکومت په حواله د شنبې او يکشنبې پر ورځو د نویو پيښو کچه ۱۵ سلنه وه چې دا د تېرې اوونۍ په پرتله يو څه ښه والی ښيي. تر دمخه دا کچه ۴۰ سلنه وه. د حکومت له اړخه سخت اقدامات د دې وبا د کنترول له پاره ګټور ثابت شوي.