پاکستان: د شپنۍ روزنې پر مهال مو بالستیک توغندی ازمویلی
۱۳۹۸ شهریور ۷, پنجشنبه
د رویترز خبري آژانس د رپوټ له مخې د پاکستان د پوځ ویاند ډګر جنرال آصف غفور، د خپل ټویټر په پیغام کې لیکلي دي: «پاکستان د شپې پر مهال د روزنې په ترڅ کې په بریالۍ توګه د غزنوي په نوم توغندي ازموینه تر سره کړې چې د بیلا بیلو سرګلولو د لیږد ظرفیت لري.»
د رپوټ له مخې دغه توغندی تر۲۹۰ کیلومتره د سرګلولې د انتقالولو وړتیا لري.
د پاکستان له لوري دغه توغندی په یوه داسې وخت کې ازمویل کیږي چې د هند له لوري د دوی تر ادارې لاندې کشمیر څخه د ځانګړي نیمه خپلواکه حیثیت د اخیستو وروسته د دواړو هیوادونو تر منځ اړیکې سختې ترینګلې دي.
دواړو هیوادونو چې اوس د اتومي قدرت درلودونکي هم دي د کشمیر پر سر درې وارې جګړې هم کړي دي.
پاکستان د هند دغه ګام سخت په غوسه کړی دی او له دغه هیواد سره یې د ترانسپورتي او اقتصادي اړیکو پر پریکون سربیره له خپل هیواد څخه د هند سفیر هم ایستلی دی.
زموږ له آرشیف څخه: