پاکستان په بې ساري توګه خپله پوځي بودجه کموي

پاکستان په اصولو کې د پیسو له نړیوال صندوق سره موافقې ته رسیدلې دي چې تر شپږ میلیارده ډالرو پور ترلاسه کړي خو پاکستان باید د دغو پیسو د ترلاسه کولو له پاره ځینې اقدامات وکړي چې په پایله کې یې د دې هیواد منفي بیلانس کې بدلون راشي.

د پیسو نړیوال صندوق روښانه کړې ده چې د اسلام آباد له خوا د پیسو تر ترلاسه کولو مخکې باید د دغه هیواد د بودجي کسر د پنځو میلیاردو ډالرو په ارزښت را کم شي. خو مخکنیو پاکستاني لومړیو وزیرانو هیڅ کله هم د دې جرأت نه دي کړی چې د پوځ بودجه کمه کړي، خکه نه یې غوښتل چې د پاکستان له پیاوړي پوځ سره مخامخ شي.

خو داسې ښکاري چې عمران خان د پوځ له جنرالانو سره ښې اړیکې لري نو له دې کبله یې ښايي د حکومت دغه پیاوړې برخه د لګښتونو کمولو ته راضي کړې وي.

د پاکستان د مالي چارو مسوول حفیظ شیخ، به د جون په یوولسمه نیټه د نوي مالي کاله له پاره چې د جولای میاشتې له لومړۍ نیټې پیلیږي، د لګښتونو پلان اعلان کړي. د پاکستان د غیر متمرکز دولتي سیستم له مخې باید فدرال حکومت د ایالتونو نیمايي بودجه هغوی ته ورکړي. د بودجې د پاتې برخې ډیري پیسې بیا پر لوړو پوځي لګښتونو او د پورونو په ادا کولو باندې مصرفیږي.

عمران خان د سه شنبې په ورځ پر خپله تویتر پاڼې باندې ولیکل چې د پوځ د بې ساري اقدام هرکلی کوي چې په ترڅ کې یې موافقه شوې ده چې د راتلونکې مالي کال له پاره به د پاکستان د اندیښنې وړ مالي وضیعت په پام کې نیولو سره د دې هیواد دفاعي لګښتونه کم کړي.

خان ویلي دي چې دغه اقدام به د دې زمینه برابره کړي چې له افغانستان سره پر پوله د پرتو قبایلو سیمو او بلوچستان پر ودې باندې مصرف وشي.

د پاکستان تیر حکومت پوځي لګښتونه شل سلنه لوړ کړي وو خو داسې ښکاري چې د هند او پاکستان تر منځ د وروستیو شخړو له کبله پوځ تر دې هم ډیرې پیسې مصرف کړې وي. دا په داسې حال کې ده چې عمران خان روښانه کړې نه ده چې د پوځ لګښتونه به څومره کم شي.

له بلې خوا بیا د پاکستان د پوځ یوه ویاند ټینګار کړی دی چې په پوځي لګښتونو کې دغه یو کلن داوطلبانه کموالی به د امنیت په قیمت تمام نه شي. هغه ټینګار کړی دی چې پر دې موضوع سربیره به هم پاکستان د ګواښونو دفع کولو بشپړه وړتیا ولري.

پاکستان د نړۍ یو له لویو پوځونو څخه لري خو منتقدین یې بیا ټینګار کوي چې د پوځ لوړ مصرفونه بې ځایه دي او له کبله یې پاکستان د روغتیا او زده کړې په برخو کې شا ته پاتې دي.

(ms/qn (reuters

زموږ له ارشیف څخه