کروناو ویروس په کومو هیوادونو کې خلک وژلي او پرې اخته شوي

په چین کې تر اوسه په دغه ویروس ۷۸۴۹۷ کسان اخته شوي او د دغه ویروس له کبله د وژل شوو کسانو شمیر ۲۷۴۴ تنو ته رسیدلی دی. تر ټولو زیاتې پيښې د چین په هوبایي ولایت کې دي.

په سویلي کوریا کې په دغه ویروس د اخته شوو کسانو شمیر ۱۵۹۵ کسانو ته رسیدلی او د کرونا ویروس له کبله ۱۳ تنه مړه شوي دي. سویلي کوریا د دغه ویروس د چټک خپریدو له کبله سخت بیړني اقدامات تر لاس لاندې نیولي دي.

په جاپان کې په کرونا ویروس د اخته کسانو شمیر ۸۹۴ تنو ته رسیدلی چې په دې کې ۷۰۵ هغه کسان هم شامل دي چې جاپان ته په یوې سترې سیاحتي بیړۍ کې روان ول. د ویروس له کبله د وژل شوو کسانو شمیر اتو تنو ته رسیدلی دی.

په ایټالیا کې په کرونا ویروس د اخته شوو کسانو شمیر ۴۴۷ کسانو ته رسیدلی دی او ۱۲ تنه مړه شوي دي. د ایټاليا حکومت د دغه هیواد په شمال کې د اغیزمنو شویو کلیو کابو ۵۰ زره کسانو ته په خپلو کورونو کې د پاتیدو سپارښتنه کړې ده.

په ایران کې په کرونا ویروس د اخته شوو کسانو شمیر ۱۴۱ تنو ته رسیدلی او ۲۲ کسانو د دغه ویروس له کبله خپل ژوند له لاسه ورکړی دی. تر ټولو زیات د قم ښار اغیزمن شوی دی.

په هانګ کې ۸۱ کسانو کې د کرونا ویروس تشخیص شوی او دوه تنه مړه شوي دي. په تایلنډ کې بیا په کرونا ویروس ۴۰ تنه اخته شوي او په تایوان کې بیا په دغه ویروس د اخته شوو کسانو شمیر ۳۲ تنه دی. په تایوان کې یو تن د دغه ویروس له کبله مړ شوی هم دی.

په امریکا متحده ایالاتو کې په کرونا ویروس د اخته شوو کسانو شمیر۶۰ ته رسیدلی دی. پر دې سربیره په چین کې یو امریکایي تبعه د دغه ویروس له کبله مړ شوی دی. په کاناډا کې په دغه ویروس ۱۲ تنه اخته شوي دي.

په آسترالیا کې ۲۳، په مالیزیا کې ۲۲ او په ویتنام کې ۱۶ تنه په کرونا ویروس اخته شوي دي. په فلیپین کې په ویروس درې تنه اخته شوي او یو مړ شوی دی.

په دغو اروپایي هیوادونو کې په فرانسه کې د کرونا ویروس له کبله دوه تنه مړه شوي او ۱۷ پرې اخته شوي دي. په آلمان کې په کرونا ویروس د اخته شوو کسانو شمیر ۱۷ او په بریتانیا کې ۱۳ تنو ته رسیدلی دی. په هسپانیا کې هم د کرونا ۱۰ مثبتې پيښې ثبت شوي دي.

په متحده عربي آماراتو کې ۱۳، په کویت کې ۱۸، عراق کې شپږ، هند کې درې او په روسیه کې پنځه تنه په کرونا ویروس اخته شوي دي. په پاکستان کې هم د کرونا ویروس دوې مثبتې پيښې ثبت شوي دي.

د هغو هیوادونو په ډله کې چې لږ تر لږه پکې یو تن په کرونا ویروس اخته شوی د افغانستان په گډون اسرائیل، لبنان، بیلجیم، نیپال، سریلانکا، سویډن، کمبودیا، فنلنډ، مصر، الجزایر، سویس، عمان، کروشیا، برازیل او ګرجستان هیوادونه شامل دي.