کرېکټ؛ افغان لوبډلې زمباوې ته د ۲۳۲ منډو په توپیر ماتې ورکړه
۱۴۰۳ آذر ۲۹, پنجشنبه
د افغانستان د کرېکټ ملي لوبډلې په دویمه نړیواله یو ورځنۍ لوبه کې د زمبابوې لوبډلې ته د ۲۳۲ منډو په توپیر ماتې ورکړه او روانې لوبلړۍ کې یې یو صفر ته مخته شوه.
زمبابوې د ټاس تر ګټلو وروسته د توپ اچونې پرېکړه وکړه. د لوبې په لومړۍ پاڼۍ کې افغان لوبډلې د صدیق اتل د چټکې سلیزې او د عبدالمالک په نیمه سلیزې سره وکولی شول، چې سیالې لوبډلې ته په ۵۰ اورونو کې د شپږو لوبغاړو په سوځیدو سره د ۲۸۶ منډو هدف وټاکي. دا په نړیوال کریکټ کې د صدیق اتل لومړۍ سلیزه وه.
په ځواب کې د زمبابوې ټول لوبغاړي د ۵۴ مجموعي منډو تر جوړولو وروسته د اتلسم اورو په پنځم توپ وسوځیدل او لوبه د افغانستان لوبډلې په خورا لوی توپیر سره وګتله.
په توپ اچونه کې له افغان لوري الله محمد غضنفر او نوید ځدران درې، درې لوبغاړي وسوځول. د زمبابوې او افغانستان ترمنځ د یو ورځینو درو لوبو، لومړۍ لوبه د باران له کبله بې پایله ختمه شوه.