Futbollistë nga ata që dikur ishin fëmijë rrugësh - Ministri i jashtëm gjerman viziton një shkollë në Burkina Faso

Ndoshta këta fëmijë janë e ardhmja e futbollit të Burkina Fasos. Në fushën e sportit jo larg rezidencës presidenciale stërviten 24 të djelmosha nga 14 deri në 18 vjeç. Të gjithë nxënës të një shkolle të veçantë. Një shkollë me mbështetje gjermane, e cila i bën futbollistë ata që dikur kanë qenë fëmijë rrugësh. "Skuadra e dashur e Alfonsit është ajo e Barcelonës dhe futbollisti më i dashur është Puholi. Ai është mbrojtës ashtu si Alfonsi, të cilit i pëlqen mënyra e të luajturit të Puholit."

Alfonsi është 14 vjeç. Një djalë i ndrojtur që flet me zë të ulët. Por ai është mjaft i vullnetshëm dhe ëndërron të bëhet futbollist. Kur erdhi këtu Alfonsi ishte i sëmurë dhe për moshën tepër i pazhvilluar, tregon mësuesi i tij, Aleksandri: "Ai luan mirë, por është shumë i dobët. Por e rëndësishme është që ai përpiqet të luftojë së bashku me më të rinjtë apo me nxënësit e një klase më lart."

Për djemtë si Alfonsi të futesh në një shkollë të tillë është si të fitosh në llotari. Përditë ka stërvitje, madje dita fillon shumë herët. Në 5:45. Por Alfonsi nuk ankohet. "Fillimisht fshihen dhomat, pastaj është orari i mëngjesit. Në shtatë fillon stërvitja. Në tetë bëhet dush, pastaj në 9:30 fillon mësimi. Në 12:45 është orari i drekës, pastaj kemi pushim dhe më vonë mësim. Nga ora 17:00 fillojmë stërvitemi. Vetëm pas ngrënies së darkës nga ora shtatë ata fillojnë të bëjnë detyrat."

Shkolla e futbollistëve të ardhshëm ka konviktin e saj. Në shtëpi të vogla por funksionuese djemtë hanë, flenë dhe mësojnë. Në kabina të vogla mbajnë gjërat e tyre personale. Gjithkund janë varur pamje nga Gjermania. Por Gjermania është tepër larg. Shkolla e futbollistëve ndodhet jashtë kryeqytetit, Kuagadogu. Punonjësja gjermane për zhvillimin, Birgit Tegtmajer ndjek zhvillimin e të rinjve. Shumë nga futbollistët e vegjël ëndërrojnë për karrierë futbollistike.

"Sigurisht që shumica e tyre ëndërrojnë që të blihen nga skuadra, ku të fitojnë shumë para. Ata e shohin veten si profesionistë në Evropë. Por kjo është gati e pamundur, sepse në rastin më të mirë ata mund të blihen nga skuadrat në vend, por që të shkojnë në Evropë duhet të kalojnë shumë pengesa burokratike. Kjo nuk është aq e lehtë."

Karriera ndërkombëtare në futboll nuk është qëllimi i shkollave të tilla, por dhënia strehë dhe shkollimi i fëmijëve të rrugës.