1. Nenda kwenye maudhui
  2. Nenda kwenye orodha kuu
  3. Nenda tovuti zaidi za DW
Yanayoangaziwa
Uchaguzi wa Marekani 2024Mzozo wa Israel na HamasBundesliga
Sauti zetuVidio zetu
Haki za binadamuKimataifa

Ripoti: Waandishi habari 104 wameuawa mwaka 2024 duniani

Bruce Amani
10 Desemba 2024

Waandishi wa habari wapatao 104 wameuawa kote ulimwenguni mnamo mwaka huu wa 2024, huku nusu ya hao wakipoteza maisha huko Gaza.

https://p.dw.com/p/4nx0S
Taathira za mzozo wa Gaza kwa waandishi habari
Mzozo wa Gaza umekuwa chanzo cha vifo vingi vya waandishi habari.Picha: Abdullah Abu Al-Khair/ZUMAPRESS/picture alliance

Hayo yameelezwa na Shirikisho la Kimataifa la Wanahabari (IFJ) lenye makao yake makuu mjini Brussels, Ubelgiji.

Katibu Mkuu wa shirikisho hilo, Anthony Bellanger, amesema mwaka 2024 umekuwa mbaya zaidi kwa wanahabari ambao wamekuwa wakilengwa moja kwa moja wakati wa mizozo kama unaoshuhudiwa huko Palestina.

Shirikisho hilo la IFJ limeorodhesha pia wanahabari 520 ambao wamezuiliwa gerezani. Maeneo yaliyotajwa kuwa hatari zaidi kwa waandishi wa habari ni Mashariki ya Kati, Asia-Pasifiki na Ulaya hasa kutokana na vita vinavyoendelea nchini Ukraine.

China iliongoza orodha ya nchi zinazowafunga jela waandishi habari ikiwa na wanahabari 135, ikiwemo Hong Kong, ambako maafisa wamekosolewa na mataifa ya magharibi kwa kulazimisha sheria za usalama wa kitaifa zinazokandamiza ukosoaji na uhuru mwingine.