Ujerumani yailaza Uholanzi 2-1

Timu ya Ujerumani iliutekeleza wajibu wake barabara uwanjani kwa kuichapa Uholanzi mabao mawili kwa moja. Mabao hao yote yalifungwa na Mario Gomez na hivyo kuiweka Ujerumani katika nafasi ya kwanza ya kundi B.

Lakini kabla ya mechi kuanza Waziri wa mambo ya nje wa Ujerumani, Guido Westerwelle, alitoa mwito kwa wapenzi wote wa kandanda kutomsahau kiongozi wa upinzani nchini Ukraine Yulia Tymoshenko Tymoshenko aliyekuwa Waziri Mkuu wa Ukraine ambako mashindano ya kugombea kombe la mataifa ya Ulaya yanafanyika, anatumikia kifungo cha miaka saba jela kwa kosa la kuyatumia vibaya madaraka alipokuwa waziri Mkuu. Wanaomuunga mkono mwanasiasa huyo wanasema kuwa adhabu aliyopewa imetokana na sababu za kisiasa.

Gomez ang'ara

Tukirejea uwanjani katika mji wa Kharkiv nchini Ukraine, Mshambuliaji wa Ujerumani Mario Gomez aliingozea timu yake pointi 3 kutokana na magoli yake mawili hapo jana na kuwapa Wajerumani matumaini makubwa zaidi safari hii ya kurudi nyumbani na kombe. Kutokana na ushindi wa jana Ujerumani sasa inaongoza katika kundi B ikiwa na ponti sita wakati timu za Denmark na Ureno zina ponti tatu kila mmoja katika kundi hilo. Waholanzi ambao ni makamu bingwa wa kandanda duniani, sasa wanashika mkia katika kundi hilo.

Kilio cha kwanza cha Waholanzi kilikuja katika dakika ya 24 ambapo Gomez alimlazimisha kipa wa uholanzi kuangilia nyuma ya goli lake na kuona jinsi wavu ulivyokuwa unatingisika. Dakika ya 38 mambo yalijirudia kwenye uwanja wa mjini Kharkiv. Timu ya Ujerumani iliongoza kwa mabao mawili. Lakini nani asiyewajua Waholanzi kwa ujasiri wao.

Walipigana kufa na kupona hadi juhudi zao zilipozaa matunda. Katika dakika ya 73 mshambuliaji maarufu Robin van Persie aliutikisa wavu wa goli la timu ya Ujerumani. Lakini bao hilo halikutosha kuwaondoa waholanzi katika hatari ya kurudi nyumbani mapema.

Ureno yaichapa Denmark

Katika mechi nyingine ya kundi B Wareno walifanikiwa kuyarudisha matumaini ya kuendelea kuwamo katika kinyang'anyiro cha kugombea kombe la mataifa ya Ulaya. Timu ya Ureno ilicheza kwa ustadi mkubwa kwenye uwanja wa Arena Lviv katika mji wa Lviv nchini Ukraine na kuichapa timu ya Denmark mabao matatu kwa mawili. Hata hivyo ushindi wa timu ya Ureno ulipatikana baada ya wachezaji wa timu hiyo kupania kweli kweli. Pumzi ya faraja ilikuja katika dakika ya 24 ambapo beki Pepe aliliona lango la Denmark kwa goli la kichwa.

Furaha ya Wareno iliongezeka katika dakika ya 36, baada ya Helder Postiga kufunga goli la pili. Lakini wasiwasi ulirudi kwa wareno baada ya Denmark kuyarudisha magoli hayo mawili. Mpaka alipopatikana shujaa wa mechi kutokea kwenye kivuli cha benchi. Jina lake ni Silvestre Varela. Na ndiye aliyewaletea Wareno ushindi kwa bao lake ambalo lilikuwa la tatu kwa Wareno. Katika hatua inayofuata katika kundi B Ujerumani itapambana na Denmark na Uholanzi itamenyana na Ureno.

Mwandishi:Mtullya Abdu/dpae/ZA/afp/rts

Mhariri: Josephat Charo