امریکی پاپ اسٹار میڈونا کا خلیجی ممالک میں پہلا کنسرٹ

امریکی پاپ اسٹار میڈونا کے گزشتہ شب جزیرہ یاس کے ایک اسٹیڈیم میں منعقد ہونے والے کنسرٹ سے لطف اندوز ہونے کے لیے قریب 25 ہزار شائقین جمع تھے۔ میڈونا نے چند روز قبل ہی اپنے ورلڈ ٹور کا آغاز مشرق وسطیٰ کے ملک اسرائیل سے کیا ہے۔ میڈونا کا کنسرٹ وقت مقررہ سے دو گھنٹے بعد شروع ہوا۔ اسٹیج پر میڈونا کے نمودار ہوتے ہی شائقین کا جوش و خروش اور والہانہ پن دیکھنے سے تعلق رکھتا تھا۔ میڈونا اُسی لباس میں ملبوس تھیں جس میں اُن کی تصویر اُن کے مشہور زمانہ البم ’ گرل گون وائلڈ‘ پر لگی ہے۔

گزشتہ روز یعنی اتوار کو میڈونا کے اس پہلے کنسرٹ کے ٹکٹس مکمل طور پر بک چُکے تھے۔ اُس کے فوراﹰ بعد ہی ان کے دوسرے کنسرٹ کے آج یعنی پیر کو انعقاد کا اعلان کر دیا گیا۔

ابوظہبی کا صحرائی گرم موسم میڈونا کے لیے نہایت غیر معمولی تھا اور اپنے پرستاروں کو مخاطب کرتے ہوئے انہوں نے کہا بھی کہ بہت زیادہ گرمی ہے۔کنسرٹ کے وقت ابو ظہبی کے اس علاقے کا درجہ حرارت 30 ڈگری سینٹی گریڈ سے اوپر تھا۔

طلا اور عُمر زارو میڈونا کے بڑے فینز ہیں۔ اُردن سے ابو ظہبی آکر وہ ایک طرف تو میڈونا کی گلوکاری سے محظوظ ہونا چاہتے تھے، دوسری طرف اپنی شادی کی تیرہویں جبکہ عمر زارو کی 41 ویں سالگرہ بھی منانا چاہتے تھے۔ اس لیے طلا نے نہایت خوش ہو کر کہا،’’دو اہم مواقع اکھٹا میڈونا کے ساتھ منانے کا لطف ہی کچھ اور ہے ، اس سے بہتر بھلا کیا ہو سکتا تھا۔‘‘#v#

میڈونا نے اس موقع پر مشرق وسطیٰ میں پا‌ئی جانے والی بد امنی اور عدم استحکام کی طرف اشارہ کرتے ہوئے شائقین سے کہا، ’’جیسا کہ آپ جانتے ہیں کہ مشرق وسطیٰ میں گزشتہ ہزاروں سال سے متنازعہ مسائل چلے آ رہے ہیں۔ انہیں اب ختم ہونا چاہیے۔ اگر آپ امن کے خواہش مند نہیں ہیں تو میرے مداح بھی نہیں ہو سکتے۔‘‘

میڈونا نے تمام شائقین سے اپیل کی کہ وہ مشرق وسطیٰ میں امن کے لیے مل کر کوششوں کا آغاز کریں۔ اُنہوں نے کہا،’’آپ میں سے ہر کوئی ابھی اسی لمحے سے قیام امن کے لیے اپنے طور پر کوششیں شروع کرے۔ تمام دنیا میں امن اُسی وقت قائم ہوگا جب مشرق وسطیٰ کا خطہ پُر امن ہوگا۔‘‘

Km/aba( AFP)