برطانوی یونیورسٹی کرکٹ ٹیم کا دورہ پاکستان

لنکاسٹر یونیورسٹی کے کھلاڑی پاکستان کرکٹ کے صدر مقام قذافی اسٹیڈیم میں ہونیوالا چار روزہ کومسیٹ انٹر یونیورسٹی کرکٹ ٹورنامنٹ تو نہ جیت سکے مگر انہوں نے وہاں موجود ہزاروں پرستاروں کے دل ضرور جیت لیے۔ مہمان ٹیم کے کپتان جون ملائے نے زندہ دلان لاہور کی مہمان نوازی کو دل کھول کر سراہا اور کہا، ’’یہ ایک شاندار ٹورنامنٹ تھا۔ ہمیں یہاں آنے سے پہلے ہی اس بات کا اندازہ تھا کہ پاکستان میں کرکٹ کا معیار بہت بلند ہے۔ ہمارے لیے لاہور آنا ایک زبردست اورانوکھا تجربہ رہا ہے۔ لاہور والے سب سے زیادہ مہمان نواز ہیں۔ میرے ہر کھلاڑی کا خیال ہے ہم یہاں اپنی زندگی کا بہترین ہفتہ گزار کر واپس جا رہے ہیں۔‘‘

پانچ برس پہلے لاہور میں سری لنکن کرکٹرز پر ہونیوالے حملے میں آٹھ افراد اپنی جان سے ہاتھ دھو بیٹھے تھے، جس کے بعد سے پاکستانی کرکٹ کے میدانوں پر ویرانیوں نے ڈیرے ڈال رکھے ہیں۔ تاہم برطانوی ٹیم کے مینجر ایڈم چائلڈ کا خیال ہے کہ لنکاسٹر یونیورسٹی کے کرکٹرز نے پاکستان میں بین الاقوامی کرکٹ کی بحالی کی جانب پہلا قدم بڑھا دیا ہے۔

چائلڈ کے بقول یہ دورہ بین لاقوامی کرکٹ کی واپسی کے ضمن میں ایک آزمائشی مثال ہے، ’’سب کچھ خوش اسلوبی سے ہوا اور ہمیں سلامتی کی بابت کوئی پریشانی نہیں ہوئی۔ اب بات آگے بڑھے گی اور اگلے مرحلے میں زیادہ اچھی ٹیمیں پاکستان آئیں گی، جس سے آخر کار یہاں بین لاقوامی کرکٹ کی بحالی میں مدد ملے گی۔ ہم نے اس سلسلے میں اپنا سا کردار ادا کردیا ہے۔‘‘

پاکستان کی جانب سے انیس سو چھیانوے میں نیوزی لینڈ کے خلاف لاہور ٹیسٹ میں اپنے پہلے میچ میں سینچری بنانے والے محمد وسیم کا کہنا تھا کہ اس دورے سے تمام دنیا کو ایک اچھا پیغام جائے گا۔ غیرملکی ٹیموں کا کھویا ہوا اعتماد بحال کرنے کے لیے پی سی بی کو اسی طرح کے چھوٹے چھوٹے قدم اٹھانا پڑیں گے۔

دوسری جانب برطانوی ذرائع ابلاغ نے انکشاف کیا ہے کہ جلد ہی ہالینڈ کی کرکٹ ٹیم بھی ٹوئنٹی ٹوئنٹی سیریز کے لیے پاکستان کا دورہ کرے گی۔ محمد وسیم، جو خود بھی ہالینڈ میں لیگ کرکٹ کھیلتے رہے ہیں، کہتے ہیں کہ ہالینڈ والوں کی یہاں آنے میں ضرور دلچسپی ہو سکتی ہے۔ ان کی کارکردگی بھی ٹوئنٹی ٹوئنٹی عالمی کپ میں اچھی تھی۔ وسیم کے مطابق پی سی بی کو دوسرے مرحلے میں سُپر لیگ کے ساتھ افغانستان اور ہالینڈ جیسے ایسوسی ایٹ ممالک کو یہاں ضرور مدعو کرنا چاہیے۔

پاکستان کرکٹ بورڈ کے چئیرمین نجم سیٹھی نے مشکل وقت میں ساتھ دینے پر مہمان برطانوی کھلاڑیوں کا شکریہ ادا کیا اور اس یقین کا اظہار کیا کہ جلد ہی انگلینڈ کی کرکٹ ٹیم بھی سیریز کھیلنے پاکستان آئے گی۔

نجم سیٹھی، جو آئی سی سی کے اجلاس کے شرکت کے بعد وطن واپس لوٹے ہیں، نے کہا کہ 2023ء تک دنیا کے تمام سرکردہ ٹیموں سے پاکستان کی سیریز کا شیڈول طے پاگیا ہے، جس میں پاک بھارت سیریز کے علاوہ ملک میں انٹرنیشنل کرکٹ کی مشروط بحالی کی شق بھی شامل ہے۔

دریں اثناء پی سی بی نے پنجاب انٹرنیشنل سپورٹس فیسٹول کے منتظمین کو ٹوئنٹی ٹوئنٹی ٹورنامنٹ کے لیے این او سی جاری کر دی ہے۔ پاکستان کی چار سرکردہ علاقائی ٹیموں لاہور لائنز، کراچی ڈولفنز، سیالکوٹ سٹالینز اور فیصل آباد وولز کے درمیان رواں ماہ کے آخر میں ہونیوالے اس مجوزہ ٹورنامنٹ میں کئی صف اوّل کے غیر ملکی کرکٹرز کو بھی مدعو کیا جا رہا ہے۔