بنڈس لیگا: تیرہواں میچ ڈے شروع

بُنڈس لیگا میں درجہ دوم سے کوالیفائی کرنے والی فورٹُونا ڈوسلڈورف (Fortuna Dusseldorf) نے ہیمبرگ کے خلاف جمعے کے روز کھیلے جانے والے میچ میں شاندار کارکردگی کا مظاہرہ کیا۔ فورٹُونا کے فارورڈ اور مڈ فیلڈر کے درمیان عمدہ تال میل سے گول کرنے کے مواقع پیدا ہوئے۔ مجموعی طور پر ڈُوسلڈورف کی ٹیم نے کل دو گول کیے۔ میچ کے دوران گولوں کا دفاع بھی ڈُوسلڈورف کے کھلاڑیوں نے شاندار انداز میں کیا۔

فورٹُونا ڈُوسلڈورف اور ہیمبرگ کے درمیان پہلا ہاف تقریباً برابری پر ختم ہونے والا تھا کہ پہلے ہاف کے اضافی وقت کے دوران ڈُوسلڈورف کو ایک گول کی سبقت حاصل ہوئی۔ یہ گول فورٹونا کے آسٹریلیا سے تعلق رکھنے والے چوبیس سالہ فارورڈ رابی کرُوز نے کیا۔ رواں سیزن میں یہ اُن کا پہلا گول تھا۔ وقفے کے بعد میچ دوبارہ شروع ہوا تو ہیمبرگ کی ٹیم نے میچ برابر کرنے کی ہر ممکن کوشش کی لیکن فورٹُونا کا دفاعی کھیل بھی متاثر کن تھا اور اس دوران اس کے فارورڈ بھی حملے کرتے رہے۔ دوسرے ہاف کے انیسویں منٹ میں فورٹُونا کے ایک دوسرے فارورڈ اشٹیفان رائزینگر نے گول کر کے اپنی ٹیم کی برتری کو مستحکم کر دیا۔

اس گول کے بعد بھی، میچ کے بقیہ وقت میں ہیمبرگ کی ٹیم نے گول کرنے کی بہت کوشش کی لیکن اسے گول کرنے میں کامیابی نہ ہوئی اور فورٹُونا ڈوسلڈورف نے یہ میچ صفر کے مقابلے میں دو گول سے جیت لیا۔

پوائنٹس ٹیبل پر اب ہیمبرگ کی نویں پوزیشن ہے اور اس کے سترہ پوائنٹس ہیں۔ جمعے کے روز میچ جیتنے والی فورٹُونا ڈُوسلڈورف کی پوزیشن تیرہویں ہے اور اس کے پوائنٹس چودہ ہیں۔ بنڈس لیگا کے موجودہ سیزن میں گزشتہ سال جن تین ٹیموں نے درجہ دوم سے کوالیفائی کیا تھا، ان میں فورٹُونا ڈُوسلڈورف کی پوزیشن سب سے بہتر ہے۔ دیگر دو ٹیمیں پوائنٹس ٹیبل کی نچلی پوزیشنوں پر ہیں۔ ان ٹیموں میں ایک گروئتھر فیُورتھ (Greuther Fuerth) اور دوسری آؤگسبرگ (Augsburg) ہے۔

تیرہویں میچ ڈے کے دوسرے دن یعنی آج ہفتے کے روز پانچ میچ شیڈیول ہیں اور کل اتوار کو مزید تین میچ کھیلے جائیں گے۔ ہفتے کے روز ایک میچ شالکے اور فرینکفرٹ کی ٹیموں کے درمیان ہوگا۔ رواں بُنڈس لیگا کی ٹاپ ٹیم بائرن میونخ بھی ہفتے کے روز ہینوور کے خلاف میچ کھیل رہی ہے۔ بائرن میونخ اسی ہفتے کے دوران یورپی کلبوں کے معتبر ٹورنامنٹ چیمپئنز لیگ کے پری کوارٹر فائنل میں پہنچنے میں کامیاب ہوئی تھی۔ بنڈس لیگا کی دفاعی چیمپئن ڈورٹمنڈ بھی آج ہفتے ہی کے روز اپنا میچ مائنز کی ٹیم کے خلاف کھیلے گی۔

بنڈس لیگا کے پوائنٹس ٹیبل پر بائرن میونخ کی ٹیم 31 پوائنٹس کے ساتھ پہلے مقام پر ہے۔ دوسری پوزیشن شالکے کے پاس ہے اور اس کے پوائنٹس 23 ہیں۔ تیسرا مقام فرینکفرٹ کے پاس ہے اور اس کے پوائنٹس بھی 23 ہیں لیکن گول اوسط کی بنیاد پر وہ اس پوزیشن پر ہے۔ دفاعی چیمپئن ڈورٹمنڈ چوتھی پوزیشن پر ہے۔

ah / at /dpa, AFP)