بھارت میں دنیا کے سب سے بڑے کرکٹ اسٹیڈیم کی تعمیر کا آغاز

بھارت کی مغربی ریاست گجرات کے شہر احمد آباد سے منگل سترہ جنوری کو ملنے والی نیوز ایجنسی اے ایف پی کی رپورٹوں کے مطابق بھارتی ریاست مغربی بنگال کے دارالحکومت کولکتہ کے ایڈن گارڈنز اسٹیڈیم کی تعمیر نو کے ایک بڑے منصوبے کے حصے کے طور پر اس میں تماشائیوں کی گنجائش کم کیے جانے کے بعد سے آسٹریلیا کے شہر میلبورن کی کرکٹ گراؤنڈ ابھی تک دنیا کا سب سے بڑا کرکٹ اسٹیڈیم ہے، جس میں قریب ایک لاکھ تماشائیوں کے بیٹھنے کی گنجائش ہے۔

لیکن احمد آباد میں کل پیر سولہ جنوری کے روز جس نئے کرکٹ اسٹیڈیم کا سنگ بنیاد رکھنے کی تقریب منعقد کی گئی، اس سے خطاب کرتے ہوئے کرکٹ حکام نے کہا کہ یہ نیا اسٹیڈیم دنیا بھر میں سب سے بڑا کرکٹ اسٹیڈیم ہو گا، جس میں ایک لاکھ دس ہزار تماشائیوں کے بیٹھنے کی گنجائش ہو گی۔

گجرات کرکٹ ایسوسی ایشن کے نائب صدر پری مل نتھوانی نے اس موقع پر کہا کہ احمد آباد شہر میں اس تعمیراتی منصوبے پر سات ارب روپے کی لاگت آئے گی اور اس اسٹیڈیم میں کئی دیگر سہولیات بھی مہیا کی جائیں گی۔

بھارتی نیوز ایجنسی پی ٹی آئی نے نتھوانی کے بیان کا حوالہ دیتے ہوئے لکھا ہے کہ اس اسٹیڈیم میں 76 کارپوریٹ باکسز، چار ڈریسنگ رومز، ایک کلب ہاؤس اور اولمپک سائز کا ایک سوئمنگ پول بھی موجود ہوں گے۔

یہ تعمیراتی منصوبہ دو سال میں مکمل ہو گا اور اس اسٹیڈیم میں تین پریکٹس گراؤنڈز اور ایک اِن ڈور کرکٹ اکیڈمی بھی ہو گی۔ یہ نیا اسٹیڈیم اس سردار پاٹیل گجرات اسٹیڈیم کی جگہ پر تعمیر کیا جائے گا، جس میں 50 ہزار تک تماشائیوں کے بیٹھنے کی گنجائش تھی اور جسے حال ہی میں منہدم کر دیا گیا تھا۔

بھارت میں، جس کی قومی کرکٹ ٹیم ٹیسٹ کرکٹ کھیلنے والی دنیا کی بہترین ٹیموں میں شمار ہوتی ہے، مجموعی طور پر ایک درجن سے زیادہ ایسے اسٹیڈیم موجود ہیں، جہاں بین الاقوامی کرکٹ میچ کھیلے جاتے ہیں۔

اے ایف پی کے مطابق یہ نیا اسٹیڈیم اپنی تعمیر کے بعد گجرات لائنز کا ہوم اسٹیڈیم بھی ہو گا، جو بھارت میں ٹی ٹوئنٹی کرکٹ کا انڈین پریمیئر لیگ ٹورنامنٹ کھیلنے والی آٹھ ٹیموں میں سے ایک ہے۔ ریاست گجرات کی ٹیم رانجی ٹرافی کی موجودہ چیمپئن بھی ہے، جو بھارت کا ڈومیسٹک کرکٹ ٹورنامنٹ ہوتا ہے۔